Փաստ ինֆո

Փաստացի Ադրբեջանի ռազմական անհաջողության համար պատասխան տվեց երկրի արտգործնախարարը, բայց նրա գլխին վաղուց էին սև ամպեր կուտակվում, պարզապես հարմար պահն ընտրվեց։ Այս մասին այսօր մամուլի ասուլիսի ժամանակ ասաց ԱԺ «Իմ քայլը» խմբակցության պատգամավոր Տաթևիկ Հայրապետյանը։

Պատգամավորը կարծում է՝ Իլհամ Ալիևը շատ մեծ սխալ թույլ տվեց բարկության ընթացքում՝ ամբողջ մեղքի բաժինը բարդելով դիվանագիտական աշխատանքի վրա։ Արդյունքում մեծ վնաս հասցրեց իր արտաքին քաղաքական կորպուսին. «Դրանից հետո Ալիևի հայտարարությունները, գործողությունները, նոր նախարարի նշանակումը բզմաթիվ հարցեր առաջացրեց թե՛ երկրի ներսում, թե՛ երկրից դուրս, որովհետև խոսքը ոչ միայն ոչ դիվանագետի նշանակման մասին է, այլև անհասկանալի է՝ ինչ կապ ունի այդ մարդն արտաքին քաղաքականության, հատկապես ԼՂ հարցի հետ։ Բանակցային գործընթացը կշարունակվի և կտեսնենք, թե ինչ զարգացումներ կունենա»,-ասաց Տաթևիկ Հայրապետյանը։

Անդրադառնալով Ալիևի այն հայտարարությանը, որ առարկայական բանակցություններ չկան և հասել են բավական մեծ հաջողությունների, բայց ռազմական գաղտնիք է և չեն կարող հրապարակել, Տաթևիկ Հայրապետյանը նկատեց, որ Ալիևն արդեն մի քանի օր է հակասական հայտարարություններով ու գործողություններով է հանդես գալիս, բայց ներադրբեջանական դաշտում քննարկում են պարտության պատճառները, գեներալի մահը և գիտակցել են, որ մեծ անհաջողություն են կրել. «Այդ քարոզչական շղարշը, որ Ալիևը փորձում է ապահովել իր դեմքը փրկելու համար, իրականում չի աշխատում»,-ասաց պատգամավորտը։

Վերջինս ընդգծեց՝ Ադրբեջանը և Թուրքիան հայերի էթնիկ բնաջնջման քաղաքականության կրողներն են, ինչը ևս մեկ անգամ ավելի հստակ է դարձնում մեր այն դիրքորոշումը, որ անվտանգային հարցերում զիջում լինել չի կարող։

Աղբյուր` Փաստինֆո