Փաստ ինֆո

Միացյալ Նահանգները ծրագրում է Աֆղանստանի տարածքից ամբողջությամբ դուրս բերել իր զորքերը 2021 թվականի մայիսին։ ԱՄՆ պետքարտուղար Մայք Պոմպեոն Սենատի միջազգային հարաբերությունների կոմիտեում ելույթի ժամանակ հայտարարել է, որ վերջնական դուրսբերման՝ նման ենթադրվող ժամկետի մասին է խոսքը, հաղորդում Է ՏԱՍՍ-ը:

«Մենք համաձայնագիր ենք կնքել։ Մենք կհասնենք զրոյի, մենք մեր ուժերը դուրս կբերենք այնտեղից։ Ես կարծում եմ, որ դա կլինի հաջորդ տարվա մայիսը», — ասել է քաղաքական գործիչը՝ պատասխանելով «Թալիբան» ահաբեկչական շարժման հետ՝ ամերիկյան կողմի բանակցությունների մասին հարցին։ Պոմպեոն ընդգծել է, որ այս պահին ԱՄՆ-ն կիսով չափ կրճատել է իր ռազմական ներկայությունը երկրում:

Փետրվարի 29-ին ԱՄՆ-ն եւ «Թալիբանը» խաղաղություն են կնքել քատարյան Դոհայում տեղի ունեցած արարողության ժամանակ: Փաստաթուղթը պետք է խաղաղություն բերի Աֆղանստանում։ Պոմպեոն թալիբներին կոչ է արել կատարել «Ալ Քաիդայի» հետ կապերը խզելու խոստումը եւ աջակցել «Իսլամական պետության» դեմ պայքարին (Երկու կազմակերպություններն էլ արգելված են Ռուսաստանում):

«Թալիբանը» ստեղծվել է 1994 թվականին աֆղանական պատերազմի թեժ պահին։ 1996-2001 թվականներին թալիբները իշխանության ղեկին էին գտնվում երկրում, իսկ 2001-ին տապալվելուց հետո սկսել էին պարտիզանական պատերազմ վարել կառավարական զորքերի և ՆԱՏՕ-ի ուժերի դեմ Աֆղանստանում և Պակիստանում։ Ներկայումս թալիբները եւ երկրի կառավարությունը քաղաքական փոխզիջման հասնելու միջոցներ են փնտրում:

Աղբյուր` Փաստինֆո