Փաստ ինֆո

Կորոնավիրուսի թվերը համեմատելով նախորդ երկու շաբաթների թվերի հետ՝ ակնհայտ է, որ բացարձակ թվով և տոկոսով բարելավում ունենք, ինչն իրապես լավ հնարավորություն է իրավիճակն այնքան լավացնելու, որ սա այլևս ճգնաժամային իրավիճակ չհամարվի։ Այսօր պարետատան նիստից հետո կայացած ճեպազրույցի ժամանակ ասաց ՀՀ առողջապահության նախարար Արսեն Թորոսյանը։

«Մեր տվյալներով ամենաշատ ակտիվ վարակվածներ ունեցել ենք հուլիսի 6-ին։ Այսինքն եթե դա համարենք պիկ, ապա այդ օրն է եղել և դրանից հետո ամեն օր ավելի քիչ թվով հիվանդներ ենք ունեցել։ Շարունակելով մեր համաճարակաբանական բոլոր պարզ կանոնները՝ ռեալ շանս ունենք տեմպը պահելու և արագացնելու՝ հասնելով այնպիսի իրավիճակի, որ այլևս ճգնաժամ չհամարենք այս իրավիճակը»,-ասաց Արսեն Թորոսյանը։

Նախարարը նշեց, որ արդեն վաղուց հոսպիտալիզացիայի խնդիր չունենք, այլ հակռակաը՝ այժմ ունենք բազմաթիվ ազատ հիվանդանոցային մահճակալներ, որոնք զբաղված չեն. «Մենք աստիճանական գնալու ենք այդ մահճակալային ֆոնդի հետծավալման, իհարկե միշտ պատրաստ լինելով մեկ-երկու օրվա մեջ դրանք նորից նույն ծավալով աշխատեցնելու։ Հավանաբար Վանաձորի ինֆեկցիոն հիվանդանոցը, Վեդու ԲԿ-ն և Դիլիջանի ԲԿ-ն օգստոսի 1-ից կվերադարձնենք իրենց հիմնական աշխատանքին։ Երևանի ևս երեք կենտրոն մոտական 10 օրերի ընթացքում կվերադառնան իրենց հիմնական աշխատանքին և այդ տրամաբանությամբ կգնանք այնքան, ինչքան պետք լինի։ Այսինքն հավելյալ մահճակալային ֆոնդ չենք պահի, բայց միևնույն ժամանակ 2800-ին մոտ մահճակալային ֆոնդը միշտ պատրաստ է լինելու 1-2 օրվա մեջ ծավալվելու»,-հավելեց Արսեն Թորոսյանը։

Նա նշեց, որ ծանր և ծայրահեղ ծանր հիվանդների թիվն էլ 500 և ավելի ցածր է, այսինքն այս առումով ևս ունենք էական առաջընթաց։

Աղբյուր` Փաստինֆո