Փաստ ինֆո

Թուրք֊ադրբեջանական զորավարժություններն անկասկած ուժի ցուցադրում են։ Այս մասին հեռուստաընկերությունների ներկայացուցիչների հետ հանդիպմանն ասել է ՀՀ երկրորդ նախագահ Ռոբերտ Քոչարյանը։

«Նման կարգի մասշտաբային զորավարժությունները ոչ միայն զորավարժություններ են, այլև լուրջ քաղաքական ազդակ՝ տարածաշրջանի բոլոր երկրների համար։ Չեմ կարծում, որ դա կարող է վերածվի ներխուժման, բայց հանգամանքը, որ քեզ ուղղակի ասում են՝ սա հնարավոր սցենար է, այո, այդպես է», - ասել է Ռոբերտ Քոչարյանը։
Անդրադառնալով այսօր ընթացող բանակցային գործընթացին՝ Ռոբերտ Քոչարյանն ասաց, որ ունեցել ենք ժամերով տևող բանակցություններ, որոնք, հետո պարզվել է, որ բանակցություններ չեն եղել։ Նրա խոսքով՝ վտանգավոր է, երբ մարդիկ չեն հասկանում հարցի կարևորությունը, բայց զբաղվում են այդ հարցով։

«Պետք է կարդալ ԼՂՀ անկախության հռչակագիրը, բանակցությունները պետք է բխեն այդ հռչակագրից: Ամեն ինչի համար հիմք է պետք: Եթե դրանք չկան կամ եթե օրական մի հիմք ես գտնում, դրա հետևանքները լավ չեն լինում»,֊ասաց Ռոբերտ Քոչարյանը։

Ինչ վերաբերում է Ալիևի՝ բանակցությունները դադարեցնելու մասին մտադրությանը, Քոչարյանն ասաց, որ բանակցություններն ավելի լավ են, քան ցանկացած պատերազմ, բայց շանտաժի ենթարկվել չի կարելի:«Պետք է սկզբունքայնություն դրսևորել: Այո, ռիսկեր կան, բայց մենք միշտ գնացել ենք ռիսկի և հաջողել ենք: Չեն ուզում բանակցել, ուրեմն չենք բանակցի: Երբ իրենք հասկանան, որ բանակցություններին այլընտրանք չկա, դրանք կվերականգնվեն»,֊նշել է ՀՀ երկրորդ նախագահը։

Աղբյուր` Փաստինֆո