Փաստ ինֆո

Հուլիսի 31-ին տեղի կունենա դատավորների ընդհանուր ժողով, որի օրակարգում է նաև ԲԴԽ անդամի ընտրությունը, որի տեղն արդեն տեւական ժամանակ է, ինչ թափուր է։ 

Հուլիսի 22-ին հայտնի դարձավ, որ դատական դեպարտամենտի ղեկավարի կողմից ԲԴԽ դատավոր անդամի թափուր տեղի ընտրության քվեաթերթիկում ներառվել է Վճռաբեկ դատարանի քաղաքացիական և վարչական պալատի 3 դատավորի՝ Սուրեն Անտոնյանի, դատավոր Գոռ Հակոբյանի և Ստեփան Միքայելյանի անունները։

Արձանագրենք, որ նշված դատավորներից ամենաբարձր վարկանիշն ունի դատավոր Ստեփան Միքայելյանը, նրա վարկանիշը հուլիսի 29-ի դրությամբ 38 միավոր է։ Նա Վճռաբեկ դատարանի քաղաքացիական և վարչական պալատի դատավոր է՝ 2018թ ապրիլի 5-ից, իսկ մինչ այդ շուրջ 10 տարի եղել է Վերաքննիչ քաղաքացիական դատարանի դատավոր։ Դատավորներ Գոռ Հակոբյանի և Սուրեն Անտոնյանի վարկանիշը 12 միավոր է։ Դատավոր Գոռ Հակոբյանը ՀՀ վճռաբեկ դատարանի դատավոր է նշանակվել Նախագահի 2010թ հոկտեմբերի 11-ի հրամանագրով։ Մյուս թեկնածուն՝ դատավոր Սուրեն Անտոնյանը, Վճռաբեկ դատարանի քաղաքացիական և վարչական պալատի դատավոր է 2009թ հունվարի 15-ից։ 2013թ հունիսի 29-ին ՀՀ նախագահի կողմից պարգևատրվել է Մխիթար Գոշի մեդալով։

«Փաստինֆո»-ի հաղորդմամբ՝ դատավորների ընդհանուր ժողովի օրակարգում հնարավոր է բարձրացվի նաև ՍԴ դատավորի թեկնածություն առաջարկելու հարցը՝ հաշվի առնելով, որ հակասահմանադրական Սահմանադրական փոփոխություններից հետո հայտարարվեց, որ դադարեցվել են ՍԴ երեք դատավորների լիազորությունները, իսկ այս պահին ՍԴ նախագահ Հրայր Թովմասյանը և ՍԴ դատավոր Արևիկ Պետրոսյանը գտնվում են արձակուրդում ՍԴ նիստերը չեն կայանում՝ քվորումի բացակայության հիմքով։ ՍԴ դատավոր Վահե Գրիգորյանի «թիմի» ներկայացուցիչները ՍԴ դատավորի պաշտոնում տեսնում են սահմանադրագետ Արմեն Մազմանյանին, ով նաև Վահե Գրիգորյանի մտերիմ ընկերներից է։ Նշենք, որ Մազմանյանը Սահմանադրական բարեփոխումների մասնագիտական խմբի անդամ է, սակայն իրավաբանական հանրությունը կասկածներ ունի նրա մասնագիտական ունակությունների վրա։ Նրա միակ «առավելությունը» Վահե Գրիգորյանի մտերիմը լինելն է։

Աղբյուր` Փաստինֆո