Փաստ ինֆո

Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, մեկնարկել է ՀՀ երկրորդ նախագահ Ռոբերտ Քոչարյանի և մյուսների գործով դատական նիստը:

Նախագահող դատավոր Աննա Դանիբեկյանը հայտնեց, որ կառավարության որոշմամբ փոփոխություններ են տեղի ունեցել թարգմանիչների ներգրավվման գործընթացում, մասնավորապես, այսուհետ թարգմանիչը պետք է ներգրավվի դատական դեպարտամենտի միջոցով։ Թարգմանիչ Վարդուհի Շահինյանը տեղեկատվություն տրամադրեց իր որակավորման և մասնագիտական փորձի մասին։ Դատարանը պարզաբանեց թարգմանչի պարտականությունները։

Փաստաբան Միհրան Պողոսյանը հետաքրքրվեց, թե ինչպես է որոշվել, որ հենց ինքը պետք է լինի սույն գործով թարգմանությունություններ իրականացնողը, թարգմանչուհին պարզաբանեց, որ որևէ կոնկրետ որոշում չի եղել և ինքն է ներգրավել որպես թարգմանիչ, քանի որ ինքն էր ազատ։ Պողոսյանը հետաքրքրվեց՝ արդյո՞ք կա համապատասխան լիազորագիր ընկերության կողմից, թարգմանիչը հայտնեց, որ ինքն է ընկերության տնօրենը և հիմնադիրը և ինքն է. սովորաբար, լիազորում և գործուղում թարգմանիչներին։ Ավելին, պարզվեց, որ նա թարգմանություններ է կատարել նաեւ սույն գործի մինչդատական վարույթում։

Նշենք, որ Շահինյանը պետք է թարգմանություններ իրականացնի Յուրի Խաչատուրովի համար, սակայն նա արդեն իսկ ունի թարգմանիչ։ Խաչատուրովը նշեց, որ նախաքննության ընթացքում նկատել է, որ թարգմանիչի և քննիչի միջև բարեկամական հարաբերություններ ունեն և կարծում է, որ տվյալ թարգմանիչն ուղարկված անձ է դատարան։ Խաչատուրովն ասաց, որ իրեն պետք է թարգմանիչ, ում նա հավատում է և մի փոքր վստահում։ Նրա խոսքով՝ դա իր ենթադրությունը չէ, այլ որպես մարդ, վստահ է, որ այդ թարգմանիչը ՀՔԾ-ի կողմից է ուղարկված, որ ինչ որ բաներ լսի և հայտնի այդ մասին։ Թարգմանչուհին ասաց, որ ինքը քննիչ Մուշեղյանի հետ գործնական հարաբերություններ ունի, պարզապես երկար տարիներ են համագործակցում։ Դատարանը գտավ, որ չկան հաստատված հանգամանքներ՝ թարգմանչին վարույթից հեռացնելու համար, ուստի, որոշում կայացրեց նոր թարգմանիչ ներգրավվելու համար։ Ինչ վերաբերում է Խաչատուրովի թարգմանչին, դատարանը պարզաբանեց, որ կառավարությունը որոշման համաձայն դատական դեպարտամենտը պետք է զբաղվի թարգմանիչների ներգրավմամբ, ուստի դատարանը չի կարող վճարել թարգմանչին, ինչին ի պատասխան թարգմանիչը, ով մինչ այս պահը զբաղվում էր Յուրի Խաչատուրովի համար թարգմանություններ իրականացնելով, նշեց, որ այս ամբողջ ընթացքում՝ մարտի 3-ից սկսած ինքը որևէ վարձատրություն չի ստացել, ավելին՝ ի սկզբանե հայտնել է, որ չի էլ ակնկալել որևէ վարձատրություն։

Յուրի Խաչատուրովն էլ ասաց, որ ցանկանում է, որ իր թարգմանիչը՝ Բաղրամյանը շարունակի թարգմանություններ իրականացնել և, եթե դատարանը չի պատրաստվում վճարել, ապա ինքը կվճարի։ Մեղադրող դատախազ Գևորգ Բաղդասարյանն էլ անհասկանալի համարեց նոր թարգմանչի ներգրավվմանը և վերջինիս վարձատրումը, եթե Յուրի Խաչատուրովը կարիք չունի նոր թարգմանչի։ Նա նշեց, որ տվյալ դեպքում Յուրի Խաչատուրովը չունի նոր թարգմանչի կարիք, քանի որ նա իր միջոցներով թարգմանիչ է ապահովում։ Դատարանը հայտնեց, որ Յուրի Խաչատուրովի թարգմանիչին՝ Բաղրամյանին վարույթից ազատելու անհրաժեշտություն չի տեսնում։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո