Փաստ ինֆո

ԱԺ «Իմ քայլը» խմբակցության պատգամավոր Հայկ Սարգսյանի մասնակցությամբ լուսանկարներն ու տեսանյութերը բավարար չեն, որպեսզի ուսումնասիրություն իրականացվի՝ հասկանալու համար Սևանում գտնվող հանգստյան գոտին իրենն է, թե ոչ։ «Փաստինֆո»-ի հետ զրույցում այս մասին ասաց «Թրանսփարենսի ինթերնեյշնլ հակակոռուպցիոն կենտրոնի» ծրագրերի ղեկավար Վարուժան Հոկտանյանը։

«Դա ուսումնասիրելու համար պետք է ոչ թե նայել, թե նա որտեղ է կանգնած կամ նստած այդ խնջույքի ժամանակ, այլ իսկապես նա է այդ լողափի իրական սեփականատերը, թե ոչ։ Իրական սեփականատերերի բացահայտման ինստիտուտը դեռ սաղմնային վիճակում է։ Այն, որ ասում են՝ ինքն է տերը, սպեկուլյացիա եմ համարում։ Պետք է դա ուսումնասիրվի։ Հարցն այլ է՝ արդյոք կա քաղաքական կամք դա ուսումնասիրելու և պարզելու։ Ուղղակի նկարներից որոշել, որ ինքը ձեռնարկատիրական գործունեությամբ է զբաղված, ծիծաղելի է»,-ասաց Վարուժան Հոկտանյանը։

Նա գտնում է, որ իրական սեփականատերերի բացահայտման ինստիտուտը հանքարդյունաբերության ոլորտից բացի պետք է ներդրվի նաև այլ ոլորտներոււմ։ Այդ դեպքում հնարավոր կլինի բացահայտումներ կատարել. «Միայն նկարներով ինչ-որ հայտարարություններ անել, որ ինքն է տերը, շատ ծիծաղելի է և պրիմիտիվ սպեկուլյացիա է։ Եթե կա ցանկություն, ապա լուրջ ուսումնասիրություն պետք է արվի։ Սակայն այդ ամենը կարող է նաև ոչ մի արդյունք չտա»,-նշեց Վարուժան Հոկտանյանը։

Հիշեցնենք, որ օրերս համացանցում տարածվել էր ԱԺ «Իմ քայլը» խմբակցության պատգամավոր Հայկ Սարգսյանի լուսանկարները, որտեղ երևում է՝ պատգամավորն առանց դիմակի մասնակցում է խնջույքի։ Լուրեր էին շրջանառվում, որ այն վայրը, որտեղ կազմակերպվել է խնջույքը, հենց պատգամավորին է պատկանում։ ԱԺ «Իմ քայլը» խմբակցության ղեկավար Լիլիթ Մակունցը ևս երեկ լրագրողների հետ հանդիպման ժամանակ անդրադարձել էր այս հարցին՝ նշելով, որ Հայկ Սարգսյանն իր հետ զրուցելիս ասել է, որ որևէ կապ չունի ո՛չ հանգստյան գոտու, ո՛չ էլ այնտեղ կազմակերպված խնջույքի հետ։

Աղբյուր` Փաստինֆո