Փաստ ինֆո

ՀՀ երկրորդ նախագահ Ռոբերտ Քոչարյանի եւ մյուսների գործով դատախազը հայտարարել է, որ շարունակելու է հրապարակել այնպիսի տեղեկություններ, որոնք, ըստ պաշտպանների անձնական կյանքի գաղտնիություն են պարունակում։ Դատախազ Պետրոս Պետրոսյանը նման հայտարարությամբ հանդես է եկել այսօրվա դատական նիստում՝ Ռոբերտ Քոչարյանի և Արմեն Գևորգյանի գույքի վրա դրված կալանքը վերացնելու միջնորդությունների քննարկման ժամանակ՝ ավելացնելով, որ այլ կերպ հիմնավորել գույքի նկատմամբ կիրառված արգելանքի իրավաչափությունը և դրա շարունակությունը՝ հնարավոր չէ։ 

Անդրադառնալով Արամ Վարդևանյանի այն հայտարարությանը, որ դատախազը հրապարակել է թվեր, ինչը համարվում է բանկային գաղտնիք՝ Պ.Պետրոսյանը նշեց, որ բազմահատոր քրեական գործն ուղարկվել է դատարան և կողմն ինքը պետք է նախաձեռնություն ցուցաբերի՝ հստակեցնելու, թե որոնք են անձնական գաղտնիք պարունակող տեղեկությունները և արդյոք դրանք կարող են հրապարակային լինել, թե ոչ։

«Ի՞նչ է ակնկալում կողմը, ակնկալում է, որ ամեն նյութից առաջ մենք հարցնենք՝ թույլ տալի՞ս եք սա հրապարակել կամ սա խախտու՞մ է ձեր անձնական գաղտնիության տվյալները»,- ասաց Պետրոսյանը՝ նշելով, որ արդյո՞ք քննարկման առարկա չէր դառնում այդ հանգամանքը, երբ նախաքննության ընթացքում դռնբաց դատական նիստեր էին լինում՝ գույքի արգելանքի վերաբերյալ։

Հովհաննես Խուդոյանն էլ արձագանքեց դատախազի հայտարարությանը՝ նշելով, որ,եթե դատախազությունը ցանկանում է հրապարակել այնպիսի տվյալ, որոնք իրենք ի պաշտոնե պարտավոր են գիտակցել, որ պարունակում է անձնական կյանքի վերաբերյալ տեղեկատվություն, ապա, այո, պետք է հարցնեն թույլտվություն։ Մեղադրող դատախազ Գևորգ Բաղդասարյանն էլ նշեց, որ նյութեր հրապարակելիս թույլտվություն չեն հարցնելու, բայց կան գործի նյութեր, որոնք վերաբերում են բանկային հաշիվներին և դրանցում առկա գումարին և, եթե չկա միջնորդություն դռնփակ նիստում քննարկելու համար, ապա միջնորդությանը ներկայացված առարկությունները ներկայացնելու համար ստիպված են ներկայացնել տվյալներ՝ բանկային գաղտնիք կազմած փաստական տվյալներից։

Հովհաննես Խուդոյանն էլ արձագանքեց՝ նշելով, որ իրենց վստահորդների վերաբերյալ տեղեկատվություն հրապարակելիս ունենում են նրանց համաձայնությունը, իսկ այսուհետ ցանկացած դեպքում, երբ խոսքը կգնա բանկային, բժշկական կամ պետական և ռազմական գաղտնիքին, ապա կպնդեն, որ նիստերն ընթանան դռնփակ կարգով, եթե իրենց վստահորդները նման ցանկություն հայտնեն։ Պաշտպան Հայկ Ալումյանն էլ նշեց, որ, եթե մեղադրող կողմը պատրաստվում է գաղտնիք հանդիսացող տվյալներ ներկայացնել, ապա միջնորդում է քննարկել հարցը դռնփակ ռեժիմով, ինչին ի պատասխան մեղադրող Պետրոսյանն ասաց, որ կփորձի չհրապարակել նման տվյալներ։

Ներկայացնելով առարկությունները՝ դատախազ Պետրոսյանն ասաց, որ Արմեն Գևորգյանին մեղսագրված արարքների դրվագով գործ ունեն հանցավոր ճանապարհով ձեռք բերված 309 մլն դրամի հետ և այդ համատեքստում սանկցիաներն ուսումնասիրելիս առկա է լրացուցիչ պատիժ՝ գույքի բռնագանձումը։ Մեղադրող դատախազ Գևորգ Բաղդասարյանն էլ նշեց, որ Ռոբերտ Քոչարյանին և Արմեն Գևորգյանին առաջադրված են այնպիսի մեղադրանքներ, որոնց դեպքում գույքի բռանագնձման ինստիտուտը կիրառելի է։ Ինչ վերաբերում է արժեքը որոշելուն, դատախազը նշեց, որ խնդիրները հաճախ առաջանում են տեխնիկական խնդիրների պատճառով, երբ հաշվի վրա դրված կալանքից հետո գումար է ավելանում հաշվի վրա և բանկային համակարգը թույլ չի տալիս դրանք տնօրինել, բացի այդ, կոռուպցիայի և փողերի լվացման դեմ պայքարի բնագավառում, պետություններին պարտավորեցնում են առանց հապաղելու կիրառել գույքի սառեցման միջոցները։

Բաղդասարյանի դիտարկմամբ՝ եթե դատարանը կգտնի, որ առկա է անհամաչափություն կամ կարող է այդպիսի անհամաչափություն առաջանալ, ապա դատարանը կարող է որպես վարույթն իրականացնող մարմին որոշել արժեքը և վերացնել անհամաչափությունը։

Բաղդասարյանը խնդրեց դատարանից մերժել միջնորդությունները։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո