Փաստ ինֆո

«Նախիջևանում Թուրքիայի կողմից այսպես կոչված զորք մտցնելու հանգամանքը պլանային զորավարժության նպատակով է և առաջին անգամը չէ։ Ադրբեջանն ու Թուրքիան պարբերաբար համատեղ զորավարժություններ են անում։ Բնականաբար, այդ զորավարժությունների ժամանակ թուրքական զինված ուժերի ստորաբաժանումներ են մտնում Նախիջևան և Ադրբեջան, այդ թվում և ավիացիա»,- «Փաստինֆո»-յի հետ զրույցում ասաց բլոգեր Կարեն Վրթանեսյանը՝ արձանագրելով, որ հակառակորդի ցանկացած լայնածավալ զորավարժություն որոշակի ռիսկեր է պարունակում մեզ համար։

Ինչպես արդեն տեղեկացրել ենք՝ հուլիսի 29-ին կմեկնարկեն Թուրքիա – Ադրբեջան լայնամասշտաբ զորավարժությունները։

Պատասխանելով «Փաստինֆո»-ի հարցին՝ որքանո՞վ են դրանք վտանգավոր, եթե հաշվի առնվի Թուրքիայի նախագահ Էրդողանի կողմից վերջին օրերին հնչող ռազմատենչ հայտարությունները՝ մասնավորապես հայ ադրբեջանական սահմանին թշնամու հրահրած ռազմական ագրեսիայի առիթով, Կարեն Վրթանեսյանը պատասխանում է. «Այո, այս զորավարժության պարագայում որոշակի նախատրամադրվածություններ կարող են լինել, հատկապես, հաշվի առնելով հայ – ադրբեջանական վերջին լարվածությունները՝ Տավուշի սահմաններին։ Այս զորավարժությունն արտառոց է միայն այդ ֆոնի վրա, Ադրբեջանին սատարող Թուրքիայի իշխանությունների ագրեսիվ հայտարարությունները նույնպես։Թե չէ թուրքական զորքի Նախիջևան գալը սպասելի իրադարձություն է, ինչպես արդեն ասացի՝ առաջին անգամը չէ։

Արդյո՞ք այս զորավարժությունների պլանային բնույթը նշանակո՞ւմ է, որ մենք անհանգստանալու բան չունենք։ Ո՛չ, չի նշանակում։ Հակառակորդի զորքերի և տեխնիկայի ցանկացած տեղաշարժ, ցանկացած ակտիվություն ռիսկային է, ցանկացած պլանային զորավարժություն կարող է քողարկված լինել իրական ռազմական գործողություններին նախապատրաստվելու գործողությունների հետևում»։

Աղբյուր` Փաստինֆո