Փաստ ինֆո

Յուրի Խաչատուրովի պաշտպան Միհրան Պողոսյանը միջնորդեց դատարանին՝ Յուրի Խաչատուրովին երկու օրով ՀՀ սահմանը հատելու թույլտվություն տալ։ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ քննվող Ռոբերտ Քոչարյանի և մյուսների գործով դատական նիստին Միհրան Պողոսյանը նշեց, որ Յուրի Խաչատուրովի նկատմամբ որպես խափանման միջոց էր ընտրվել այլընտրանքային խափանման միջոց գրավը, նախկինում գործող կարգավորումների համաձայն գրավը վճարվել է և Յուրի Խաչատուրովն ազատ է արձակվել, մեկնել է ՌԴ, ինչից հետո պաշտոնից ազատվելուց անմիջապես հետո վերադարձել է ՀՀ, եւ այլեւս չի լքել երկրի տարածքը։ Պողոսյանը նշեց, որ Յուրի Խաչատուրովը ծնվել է Վրաստանի Հանրապետությունում և նրա ծնողները և եղբայրները հուղարկավորված են իր ծննդավայրում, իսկ Յուրի Խաչատուրովը 2018թ նոյեմբեր ամսից չի եղել այնտեղ։ Պողոսյանի խոսքով՝ Յուրի Խաչատուրովի բացակայությունը որևէ ազդեցություն չի ունենա գործի քննության վրա, քանի որ դատական նիստերը նշանակվում են, սովորաբար երեքշաբթի օրերին, ուստի դատական նիստերի ընթացքում՝ երկու օրով նա կարող է բացակայել ՀՀ-ից, իսկ հարկ եղած դեպքում ժամերի ընթացքում կարող են ապահովել Յուրի Խաչատուրովի ներկայությունը դատական նիստերին։ Մեղադրող դատախազ Գևորգ Բաղդասարյանն էլ մտահոգություն հայտնեց կապված պատճառաբանության հետ, մասնավորապես անդրադարձավ այն պնդմանը, որ կանխատեսվում է, որ օգոստոսի 1-ից պետական սահմանին շարժն ավելանալու է և վերադարձի խնդրի դեպքում նախապես կճշտեն, նշելով. «Ինչպե՞ս եք ճշտելու, Վրաստանի կառավարությունից պետք է ճշտեք՝ օրինակ` օգոստոսի 10-ին սահմանը փակելու են, թե ոչ։ Սահմանը փակելու հնարավորությունը կարող է առաջանալ ինչ-որ մի օրից, երբ կառավարությունը փոխի սահմանված ռեժիմը։ Միգուցե հենց այդ ռեժիմը սահմանված լինելու ժամանակ էլ, նկատի ունենալով ռեժիմի առանձնահատկությունները, կքննարկենք»։ 

Դատավարության կողմերին լսելուց հետո դատավոր Աննա Դանիբեկյանն ասաց, որ կորոնավիրուսի համավարակի պայմաններում ՀՀ վերադարձող յուրաքանչյուր քաղաքացի պետք է 14 օր մեկուսանա։

«Յուրաքանչյուր սահմանահատման թույլտվություն տալու դեպքում դատարանը պետք է գնահատի մի կողմից ամբաստանյալի կողմից դատարան ներկայանալուն խոչընդոտելու հանգամանքը, մյուս կողմից՝ դատարանը պետք է գնահատի այն փաստարկումը, որը դրված է մեկնման անհրաժեշտության հիմքում, մասնավորապես, այդ փաստարկումը պետք է լինի այնքան ծանրակշիռ, որ գերակշռի դատարան չներկայանալու ռիսկը, տվյալ պարագայում, դատարանն ակնհայտ հանգամանքներ է արձանագրում, որոնք կարող են խոչընդոտել Խաչատուրովի՝ դատարան ներկայանալուն», - ասաց Աննա Դանիբեկյանը՝ ավելացնելով, որ այս պահին նպատակահարմար չի գտնում թույլատրել Խաչատուրովին լքել ՀՀ սահմանը։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո