Փաստ ինֆո

Այս պահին դեռ պարզ չէ վեց աշխատակիցները դեռ շարունակում են մնալ Ամուլսարում թե ոչ։ « Օրվա ընթացքում պարզ կլինի, որովհետև մենք ֆիզիկապես հնարավորություն չունենք մուտք գործելու և հասկանալու այնտեղ են թե ոչ։ Մենք կողքի բլուրներից նայելով ենք հասկանում, քանի որ տեղանքը ցածրադիր է, եթե այնտեղ շարժ է լինում, պարզ է դառնում»։ Այս մասին «Փաստինֆո»-ին տեղեկացրեց Ջերմուկի բնակիչ, ակտիվիստ Շիրակ Բունիաթյանը։

Գիշերը տեղի ունեցած բախումների ժամանակ Շիրակ Բունիաթյանը սոցցանցի միջոցով տեղեկացրել էր, որ երկու օր առաջ 6 բանվոր մտել են Ամուլսարի տարածք, ինչ-որ աշխատանքներ արել և այն բանից հետո, երբ իմացել են, որ իրենց մասին բնակիչները գիտեն, դուրս չեն գալիս հանքի տարածքից՝ պատճառաբանելով, որ վախենում են դուրս գալ ՝ չնայած նրանց անվտանգության համար բնակիչների տված երաշխիքների։

«Մենք չենք կարողանում անմիջապես իրանց հետ զրուցել կամ հանդիպել, մեր ուղերձը եղել է միջնորդավորված։ Խնդրել ենք պահնորդական ծառայության աշխատակիցներին իրենց փոխանցեն, որ իրենք դուրս գան, քանի որ իրենց ներկա գտնվելը ժողովրդի մոտ զայրույթ է առաջացնում։ Իրենք փոխանցել են, որ վախենում են դուրս գալ, քանի որ մտավախություն ունեն, որ բնակիչները կարող են իրենց հանդեպ բռնություն կիրառել։ Բազում երաշխիքներ ենք տվել, խոստացել ենք, որ նման բան չի կարող լինել։ Մենք բոլորս էլ հայ ենք, թշնամիներ չենք, եթե դուք այդ տարածքում եք՝ դուրս եկեք գնացեք։ Երկու օր շարունակվող «բանակցությունները» անարդյունք էին։ Երեկ մարդիկ ինքնաբուխ կերպով հավաքվել էին, զայրացած պահանջում էին, որ իրենք դուրս գան այդտեղից»։

Ջերմուկի բնակիչները մտավախություն չունեն, որ 6 հոգով լուրջ, մեծ շինարարական աշխատանքներ են անելու, կամ 6 հոգով հանք են շահագործելու։

«Հասկանում ենք, որ նրանց ներկայությունը զուտ իրավիճակը լարելն է։ Իրենց ոճին համապատասխան սադրանք է։ Ուզում են այդ մարդկանց ներկայությունով գրգռել մարդկանց նյարդերը, որպեսզի մարդիկ ինչ-որ քայլերի գնան, որը կբերի իրավական հետևանքների և ուժի կիրառման»,- ասաց Շիրակ Բունիաթյանը։

Ջերմուկի բնակիչը հավելեց, որ իրենք «Լիդիան Արմենիա»-ի աշխատակիցներ չեն, այլ կապալառու կազմակերպության աշխատակիցներ են։

«Տվյալ դեպքում որ կազմակերպությունում աշխատում են, կարծում եմ հենց այդ «կազմակերպությունը» պետք է իր աշխատակցի անվտանգության կամ աշխատանքային պայմանների մասին հոգ տաներ, բայց դա իրենց աշխատանքային կանոնադրությամբ են երևի որոշել, որ նորմալ է, որ աշխատակիցներն այդ վիճակում են։ Մենք փորձում ենք չհայտնվել այդ մարդկանց դերում և կարծիքներ ասել։ Մենք բնակիչ ենք, մենք մեր տեսանկյունից կարող ենք հարցին նայել։ Ցանկություն չունենք այդ մարդկանց նկատմամբ բռնի քայլեր անենք, մանավանդ 2,5 տարում ապացուցել ենք, որ Ջերմուկի բնակիչները խաղաղասեր են և բռնությունը մեր մոտ տեղ չունի»։

Հիշեցնենք, որ հուլիսի 27-ին` ժամը 22:00-ի սահմաններում, բախումներ տեղի ունեցան Ամուլսարի հանք տանող երկրորդ պահակակետի մոտ: Ոստիկանները բերման են ենթարկել Ջերմուկի 9 բնակչի:

Աղբյուր` Փաստինֆո