Փաստ ինֆո

Սննդի անվտանգության տեսչական մարմինը 14 օրով դադարեցնում է «Սպիտակ Շորժա» հանգստյան գոտու խոհանոցի գործունեությունը՝ պարետատան ցուցումով։ Ստուգման ընթացքում խախտումներ են հայտնաբերվել։ Այս մասին «Փաստինֆո»-ին տեղեկացրեց ՍԱՏՄ իրազեկման, խորհրդատվության և հանրության հետ տարվող աշխատանքների պետ Անուշ Հարությունյանը։

«Լողափի գործունեության կասեցման որոշումը կայացվել է պարետատան կողմից՝ 14 օրով։ Մենք երեկ՝ ամսի 27-ի ստուգումների արդյունքում բավականաչափ խախտումներ ենք հայտնաբերել կապված պարետի որոշումների չկատարման հետ։ Դրանք և փակ աղբարկղերի բացակայությունն է՝ նախատեղված դիմակների համար, և համապատասխան հեռավորությունը պահպանված չի եղել, և անձանց կուտակումներ են եղել առանց սոցիալական հեռավորություն պահպանելու, նաև դիմակներ չեն կրել այդ մարդիկ։ Ինչպես գիտեք խնջույք է կազմակերպվել դրա նախորդ օրը՝ ամսի 26-ին, կենդանի երաժշտությամբ՝ ինչը պարետի որոշմամբ արգելված է։ Եղել են նաև գրանցամատյանների լրացման խախտումներ՝ հատկապես ջերմաչափման գրանցամատյանները նորմալ լրացված չեն եղել»։

ՍԱՏՄ-ն ստանում է ցուցումներ պարետատան կողմից՝ իրականացնելու պարետի որոշումների կատարման հսկողություն։ Արդեն 4 ամիս ձգվող արտակարգ դրության ժամանակ կրկնայցեր են կատարում և եթե հայտնաբերվում են խախտումներ՝ կրկին պատժվում են տնտեսվարողները։

«Մեր գործառույթները սահմանափակվում են սննդի վերահսկողությամբ, մենք այս պահին ոչ թե լողափի գործունեությունն ենք կասեցրել, այն կարող է շարունակել իր տնտեսավարումը։ Մենք այնտեղ գործող խոհանոցային, բարային հատվածի աշխատանքն ենք կասեցրել, որը մեր գործառույթների շրջանակում է»,- ասաց Անուշ Հարությունյանը։

Հիշեցնենք, որ Սևանի White Shorja լողափում տեղի էր ունեցել բազմամարդ «փարթի», որին ներկա է եղել նաև պատգամավոր Հայկ Սարգսյանը: Մամուլի հրապարակումների համաձայն՝ լողափը պատկանում է Հայկ Սարգսյանին: Պատգամավորը հաստատել, որ եղել է խնջույքի վայրում՝ առանց դիմակի, ներողություն խնդրել։ Դրանից հետո համացանցում հայտնվել էր լուսանկար, որում պատգամավորը դրամարկղն է ստուգում՝ մի վայրում, ուր սովորական այցելուների մուտքը արգելված է։

Աղբյուր` Փաստինֆո