Փաստ ինֆո

Ռոբերտ Քոչարյանի գույքի վրա կալանք դնելու մասին քննիչի որոշումը պատճառաբանված չէ. նշված չէ, թե ինչու քննիչը եզրահանգեց, որ պարոն Քոչարյանը կարող է թաքցնել իր գույքը, թե ինչ կապ ունի գույքի կալանքն առաջադրված մեղադրանքի հետ, թե ինչ դատական ծախսեր կարող են առաջանալ, քաղաքացիական հայց կարո՞ղ է լինել, թե ոչ։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց պաշտպան Հովհաննես Խուդոյանը՝ ներկայացնելով Ռոբերտ Քոչարյանի գույքի վրա դրված կալանքը վերացնելու մասին միջնորդությունը։

Պաշտպանը հայտնեց, որ սահմանադրական կարգի տապալման վերաբերյալ հոդվածը որպես պատիժ չի պարունակում գույքի բռնագրավում, բացի այդ, որևէ մեկը չի կարող ասել, որ սահմանադրական կարգի տապալման արդյունքում անձինք ձեռք են բերում գույք։ Նրա խոսքով՝ նույնիսկ անտրամաբանական պատճառաբանություն նշված չի եղել, որոշումը դատարկ է եղել։
«Մի կողմ թողնենք այն հանգամանքը, որ ՀՀ քրեական դատավարության օրենսգիրքը նախատեսում է, որ գույքի վրա կալանք դնելու որոշման մեջ ուղղակիորեն պետք է նշված լինի գույքի այն չափը, որը բավարար է դատավարական նպատակին հասնելու համար։ Քննիչի և դատախազի որոշումների պատճառաբանությունները հանգում են նրան, որ «մենք ենթադրում ենք, որ այս գործով կարող է երբևէ ներկայացվել քաղաքացիական հայց»»,- ասաց Խուդոյանը՝ նշելով, որ գործն արդեն դատարանի վարույթում է , բայց որևէ քաղաքացիական հայց ներկայացված չէ։
Նա նաև հայտնեց, որ 2018թ հոկտեմբերին Երևանի ընդհանուր իրավասության դատարան բողոք է ներկայացվել, որը, ոչ այդքան օբյեկտիվ խոչընդոտներ հաղթահարելով, մակագրվել է դատավորներից մեկին, ով որոշում է կայացրել, որ Ռոբերտ Քոչարյանի իրավունքները խախտվել են և գույքի վրա կալանք դնելու որոշումն ամբողջությամբ ապօրինի են եղել, իսկ Վերաքննիչ դատարանը վերահաստատել է դատարանի որոշումը։ Խուդոյանի խոսքով՝ երբ դատավոր Աննա Դանիբեկյանը վարույթ է ընդունել գործը, նշել է, որ տվյալ հարցին պետք է անդրադառնալ դատաքննության փուլում, ընդ որում, դատարանին հայտնի է եղել Ռոբերտ Քոչարյանի իրավունքների խախտման մասին։
«Գրեթե մեկ տարի է անցել այդ որոշումից և շուրջ մեկ տարի է, ինչ ՀՀ դատարանի կողմից ճանաչված խախտումը չի վերացվել, մինչդեռ, այս գործով վարույթ իրականացնելիս, հարգելի դատարան, Դուք պարտավոր էիք, անկախ նրանից դատավարության տվյալ փուլն է, թե ոչ, կողմից միջնորդություն է ներկայացվել, թե ոչ, եթե Ձեր վարույթի շրջանակներում տեսնում եք խախտում, պետք է օպերատիվ արձագանքեք և վերացնեք այն»,- ասաց Խուդոյանը՝ նշելով, որ միջնորդության մեջ ներկայացված հիմնավորումները չի ներկայացնում, քանի որ դատավոր Աննա Դանիբեկյանն է կայացրել նման որոշում, ուստի՝ ծանոթ է հիմքերին։
Պաշտպան Արամ Վարդևանյանն էլ ընդգծեց, որ, թեև Ռոբերտ Քոչարյանի սեփականության իրավունքների խախտումն առաջինը ճանաչել է դատավոր Աննա Դանիբեկյանը, սակայն այդ որոշումն անցել է եռաստիճան դատական համակարգով, ուստի, փաստ է, որ ոչ միայն, որ դատարանը ճիշտ իրավական գնահատական է տվել, այլև այն, որ այդ գնահատականի հետ համակարծիք է Վերաքննիչ և Վճռաբեկ դատարանները։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։
Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։
Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո