Փաստ ինֆո

«Ոչ վարկային թալանին» նախաձեռնող խումբը Հայաստանի մարզերում իրականացնում էր իրազեկման աշխատանքներ։ Նախօրեին նախաձեռնության ղեկավար Մանուել Մանուկյանը և ևս երկու ակտիվիստ Աշտարակում բերման են ենթարկվել։

«Փաստինֆո»-ի հետ զրույցում նախաձեռնության ղեկավարը նշեց, որ իրեն բերման են ենթարկել անհիմն, բռնության գործադրմամբ՝ ոլորել պարանոցը և ֆիզիկական ցավ պատճառել։

«Ես քայլում էի Աշտարակում, վերջացրել էի բուկլետ բաժանելու գործը, մտել մոտակա խանութ, որտեղ ծանոթ մարդու պետք է հանդիպեի: Եկան, դուրս հրավիրեցին, և ասացին որ ինձ բերման կենթարկեն, եթե ես այդտեղից չհեռանամ։ Ես ասացի, որ իրենք չունեն որևիցե օրինական հիմք՝ ինձ հեռացնելու։ Երբ երկրորդ անգամ նորից դուրս եկա` ասացին, որ հավաք ենք իրականացնում, ասացի որ որևիցե հավաք չեմ իրականացնում՝ այդ թվում խանութ էի մտել, ցանկանում էի նաև առևտուր անել, բայց իրենք ապօրինաբար ինձ՝ Աշտարակի ոստիկանապետի հրամանով բերման ենթարկեցին»։

Մանուել Մանուկյանը կարծում է, որ գուցե կար ներքին հրաման։ Նույն օրը շուկայում իրազեկման աշխատանքների ժամանակ իրենք մեծ աջակցություն ունեին, քաղաքացիները համակարծիք էին խմբի հետ։

«Շատ հնարավոր է տեսած լինեն, այն որ ժողովուրդը իր պրոբլեմը ներկայացնում էր և ասում , որ մենք ճիշտ ենք, դա է հնարավոր շարժառիթ եղել, որ ինձ ներքին հրամանով բերման են ենթարկել՝ առանց ոստիկանի օրինական պահանջ ներկայացնելու, առանց որևիցե հիմնավորումների՝ ուղղակի հրաման էր տրված և ինձ բերման ենթարկեցին, որին մասնակցում էր կոնկրետ Աշտարակի ոստիկանապետը»,- ասաց Մանուել Մանուկյանը։

Նախաձեռնության ղեկավարը պատմեց, որ շտապ օգնությունը զննություն չի իրականացրել, իսկ ոստիկանությունում չգիտեին, թե իրեն ինչու են բերման ենթարկել։ Ինքը վստահ է, որ պարետի կողմից նշված օրենքները չի խախտել։

«Ոստիկանապետի գլխավորությամբ աշխատակիցները չէին տիրապետում ոչ թղթաբանությանը, ոչ վարչական տույժի ենթարկելուն։ Այդ թվում նաև երկու տղաների էին բերման ենթարկել, բայց չէին պատասխանում ինչ հիմքով։ Նրանք նույնպես Երևանից եկել էին մեզ հետ։ Եղել ենք դիմակներով, սոցիալական հեռավորություն պահել եմ»։
Մանուել Մանուկյանն այժմ փաստաբանի հետ քննարկում է ոստիկանների գործողությունները վիճարկելու հարցը ։

«Այնքան անլուրջ տպավորություն թողեցին, որ ինձ մի պահ թվաց, որ ոչ թե ոստիկանությունում եմ, այլ ինչ որ «քուչի բեսեդկում»։ Այս ամեն ինչի մասին միանշանակ պատրաստվում եմ բարձրաձայնել»։

Մանուել Մանուկյանն ասում է, որ իր անձը հետապնդման է ենթարկվում, բայց իր պայքարը հանուն հասարակ մարդու է։

«Որ պաշտոնյան կդիմադրի «Ոչ վարկային թալանին» նախաձեռնությանը, նա ուրեմն հակահեղափոխական է նա գործում է կոնկրետ ժողովրդի դեմ։ Այս ամենին արձագանքել էին ՔՊ կուսակցության անդամագրված մարդիկ, որ այսօր գործում են ժողովրդի դեմ, չեն ուզում, որ մարդիկ ստանան վարկային արձակուրդ։ Արմեն Հովհաննիսյանը, Ստյոպիկ Սաֆարյանը դիմադրություն են ցույց տալիս մեր պայքարին։ Մեզ համար զարմանալի է, ոնց կարող է ժողովրդի անունից խոսացող կուսակցության ներկայացուցիչներն այսօր դեմ դուրս գան ժողովրդին։ Եթե իրենք հայտարարում են, որ թալանչի վարկային կազմակերպությունների հետ իրենք կապ չունեն՝ ինչ համար են այսօր իրենք դիմադրում և պաշտպանում այդ կազմակերպություններին։ Կասկածներ ունենք, որ այսօր էլ իրենց իշխանության օրոք իրենք են համագործակցում և իրենք են սնվում այդ թալանչի վարկային կազմակերպություններից, դրա համար պայքարում են հասարակ ժողովրդի դեմ ու նրանք են դա ապացուցում իրենց գործողություններով»,- ասաց նա։

Աղբյուր` Փաստինֆո