Փաստ ինֆո

Ռոբերտ Քոչարյանի գույքի և հաշիվների օրինականությունը որևէ մեկի մոտ կասկած չի կարող առաջացնել։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց երկրորդ նախագահը։

«Շատ է խոսվել ապօրինի գույքի ձեռքբերման մասին։ Այժմ քննարկվում է իմ գույքի և հաշիվների կալանքի հարցը։ Մեկ տուն է, որ ես ստացել եմ պետության կողմից և երկու հաշիվներ են, որոնց բոլոր փոխանցումներն արվել են մեկ աղբյուրից»,- ասաց Ռոբերտ Քոչարյանը։
Ավելի վաղ հայտնել ենք, որ Ռոբերտ Քոչարյանի և Արմեն Գևորգյանի պաշտպանները միջնորդություն են ներկայացրել դատարան՝ գույքի վրա դրված արգելանքը վերացնելու մասին, ինչի դեմ առարկել են դատախազները՝ խնդրելով դատարանից մերժել միջնորդությունները։ Եզրափակիչ հայտարարությունների ընթացքում պաշտպան Հայկ Ալումյանն ասաց, որ դատարանը պետք է որոշի միայն վերացնել ՝ դատարանի կողմից արձանագրված, ուժի մեջ մտած դատական արձանագրված իրավունքների խախտումը, թե ոչ։

«Դատախազությունն ասում է՝ չվերացնել, մենք առաջարկում ենք՝ վերացնել։ Հիմա Դուք որոշեք, թե ց ով է ավելի ճիշտ»,- ասաց Ալումյանը։ Հովհաննես Խուդոյանն էլ նշեց, որ միայն այն հանգամանքը, որ դատախազությունը ինչ որ մեկին ինչ որ բանում մեղադրում է, դեռ բավարար չէ իրավունքների սահմանափակման համար և յուրաքանչյուր դատական ակտ պետք է ունենա և իրավական, և փաստական հիմքեր։ Լսելով կողմերին՝ նախագահող դատավոր Աննա Դանիբեկյանն ասաց, որ միջնորդությունների լուծման համար անհրաժեշտ են լրացուցիչ փաստաթղթեր, մասնավորապես՝ կալանադրված գույքի արժեքի վերաբերյալ։

Արմեն Գեւորգյանի փաստաբան Ալեքսանյանն ասաց, որ այլ փաստական տվյալ չկա և ինչ որ կա, արդեն ներկայացվել է։ Նախագահող դատավորն ասաց, որ պաշտպանական կողմը պետք է ներկայացնի Ռոբերտ Քոչարյանի ու Արմեն Գեւորգյանի կալանադրված գույքի վերաբերյալ տվյալները՝ բանկային հաշիվների վերաբերյալ քաղվածքները և սեփականության իրավունքի վերաբերյալ փաստաթղթերը։
Հովհաննես Խուդոյանը համոզմունք հայտնեց, որ դատարանը նշված տվյալների անհրաժեշտությունը չունի եւ որ դատարանից ակնկալում են իրավունքների խախտման վերացումը և, եթե դատարանը գտնում է, որ գույքի կալանքն ինչ որ չափով անհրաժեշտ է գործի վարույթի շրջանակներում, ապա դատարանը պետք է արձանագրի չափը եւ առարկեց դատարանի գործողությունների դեմ։
Հաջորդ դատական նիստը կկայանա օգոստոսի 4-ին։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո