Փաստ ինֆո

Հուլիսի 24-ին «Ծիրանի» ռեստորանային համալիր ՀՀ ոստիկանապետի այցի մասին «Փաստինֆո»-ի տարածած տեղեկատվությունը ՀՀ ոստիկանությունը հաստատում է։ 

«Փաստինֆո»-ի հարցին, թե հուլիսի 24-ին ոստիկանապետ Վահե Ղազարյանն այլ բարձրաստիճան ոստիկանների հետ այցելել է արդյոք «Ծիրանի» ռեստորան՝ Ոստիկանությունից հաստատեցին՝ նշելով, որ «ՀՀ ոստիկանապետ Վահե Ղազարյանի, ինչպես նաև ոստիկանության բարձրաստիճան պաշտոնյաների մասնակցությամբ հուլիսի 24-ին խնջույք տեղի չի ունեցել, եղել է պաշտոնական ընթրիք՝ Արցախի պատվիրակության ընդունելության առթիվ և նաև ընդունելության ողջ ընթացքում խստորեն պահպանվել են անվտանգության նորմերը»

Ավելի վաղ «Փաստինֆո»-ն հայտնել է, որ հուլիսի 24-ին ՀՀ ոստիկանության բարձրաստիճան ոստիկանները` ՀՀ ոստիկանապետ Վահե Ղազարյանի գլխավորությամբ խնջույք են կազմակերպել «Ծիրանի» ռեստորանային համալիրում:

Տարածքում գտնվող մեր լրագրողը նկատել է ոչ միայն ոստիկանապետի ծառայողական մեքենան, այլ նաեւ՝ շուրջ երկու տասնյակի հասնող այլ մեքենաները՝ ոստիկանության, պետական համարանիշերով, ինչպես նաեւ ճանապարհային ոստիկանության ուղեկցող ավտոմեքենաներ, ինչի վերաբերյալ ապացույցներ՝ լուսանկարների տեսքով, ունենք մեր տրամադրության տակ։ Սակայն Փաշինյանի համաերկրացի ոստիկանապետը պատասխանատվության չի ենթարկվել։ Վարչապետի մամուլի խոսնակը հայտարարել է, թե ապացույցներ չեն տեսել, այսինքն՝ սպասում են լուսանկարների, մինչդեռ անգամ ոստիկանությունը հաստատում է, որ առնվազն ճաշկերույթ եղել է։ Մեր տեղեկություններով՝ բավական բազմամարդ ու աղմկոտ, ինչը գրավել է այցելուների ուշադրությունը։

Այդուհանդերձ՝  հակահամաճարակային կանոնները որքան ուզում եք կարող եք խախտել  ու մնալ անպատիժ, քանի դեռ վարչապետի ընկերն եք ու չկա ինտերնետում հրապարակված լուսանկար։ Իսկ լուսանկարներ մենք ունենք, որոնք կհանրայնացնենք, երբ ինքներս դրա անհրաժեշտությունը կտեսնենք։

Աղբյուր` Փաստինֆո