Փաստ ինֆո

Հայ մատակարարողների ապրանքներից հրաժարվելու ալիքը հասել է մինչև Կամչատկա։ Այս մասին «Փաստինֆո»-ի հետ զրույցում ասաց Ռուսաստանի հայերի միության՝ Կամչատկայի երկրամասի ղեկավար Արթուր Խաչատրյանը։

Նրա փոխանցմամբ՝ այս պահին որոշ ադրբեջանցիներ հայկական արտադրողներից արտադրանք չեն վերցնում, այժմ հետևում են իրավիճակին։ Հայկական համայնքի կազմակեպությունները ներքին ուժերով փորձում են լուծումներ գտնել հայ մատակարարների ապրանքի ընդունման հետ կապված հարցին։

Հիշեցնենք, որ ռուսական շուկայում հայկական գյուղմթերքի իրացման խնդիրն ի հայտ եկավ, երբ ադրբեջանցիների զինված ուժերը արժանի հակահարված ստացան Տավուշի սահմանամերձ բնակավայրերի նկատմամբ կատարված ռազմական ագրեսիայի դիմաց։ Մոսկվայի ամենամեծ` Food City մթերային շուկան, որի սեփականատերը ադրբեջանցի է, հրաժարվեց ընդունել հայկական ծիրան տեղափոխող բեռնատարներին, ինչին ի պատասխան մոսկվայաբնակ հայերը համախմբված կերպով ամբողջ ծիրանի գնեցին, իսկ ռուսաստանաբնակ հայ գործարարները, մասնավորապես «Տաշիր» ընկերությունների խմբի սեփականատեր Սամվել Կարապետյանը հայաստանյան գյուղմթերքի վաճառքի համար նոր հարթակներ ստեղծեցին՝ ընդ որում անվճար։ Միաժամանակ ադրբեջանցիները սկսեցին գրոհներ կազմակերպել հայկական օբյեկտների վրա, խմբերով հարձակվել փոքրաթիվ կամ միայնակ գտնվող հայերի վրա, ինչին սկսեցին հակահարված տալ նաեւ հայերը։

Ա.Խաչատրյանը տեղեկացրեց, որ Ռուսաստանը մայրաքաղաքում ձեւավորված լարվածությունը տեղափոխվել էր նաեւ Կամչատկա։

«Կամչատկայում առաջին անգամ է նման բան կատարվում։ Կամչատկայում հայերի և ադրբեջանցիների բնակության ամբողջ պատմության մեջ նման բան չի եղել։ Սա առաջին դեպքն է»,- ասաց նա՝ նշելով, որ երկրամասում լուրջ կոնֆլիկտ էր հասունանում, սակայն տեղի ուժային կառույցներն օպերատիվ արձագանքել են և կանխարգելել են կոնֆլիկտը։

Աղբյուր` Փաստինֆո