Փաստ ինֆո

«Ուսանող ենք» - վանկարկումներով ԲՈւՀ-եր չընդունված դիմորդներն ու նրանց ծնողներն այս պահին բողոքի ակցիա են իրականացնում ԿԳՄՍ նախարարության դիմաց։ Նրանք ցանկանում են հանդիպել ԿԳՄՍ նախարար Արայիկ Հարությունյանի հետ, սակայն մամուլի խոսնակը տեղեկացրել է, որ բողոքի ակցիա մասնակիցները կարող են հանդիպել միայն փոխնախարարի հետ։ Դիմորդները հրաժարվել են փոխնախարարի հետ հանդիպման առաջարկից և հայտարարել, որ հանդիպում են ունենալու միայն նախարարի հետ, քանի որ իրենց հարցերը միայն նրան են ուղղված։ Դիմորդների ծնողներն արդեն իսկ հայտարարել են, որ պատրաստվում են դատական գործ սկսել նախարար Արայիկ Հարությունյանի դեմ։ 

ԲՈւՀ-եր չընդունված դիմորդների փաստաբան Ալեքսանդր Կոչուբաևը բողոքի ակցիայի վայրից լրագրողներին հայտնեց, որ մեկ ժամ են տվել նախարար Արայիկ Հարությունյանին, որպեսզի նա իջնի հանդիպի դիմորդների հետ. «Կսպասենք, մինչև այն ավարտվի և, ըստ այդմ, կդիմենք իրավիճակից բխող համապատասխան քայլերի։ Իրավաբանական պրոցեսի առումով քննարկում ենք մի քանի հնարավոր տարբերակներ։ Չորեքշաբթի այս առումով հստակեցում կունենանք, բայց նախնական տպավորությունն այն է, որ կդիմենք վարչական դատարան և Կառավարության ընդունած որոշումը օրենքի հակասելու պատճառաբանությամբ անվավեր ճանաչելու պահանջ կներկայացնենք։ Նախարարն ու ԳԹԿ-ն կարող են ասել այն, ինչ ուզում եմ, սակայն դրանից իրավակարգավորումները չեն փոփոխվում, իսկ մենք ունենք իրավակարգավորման այնպիսի տեսակ, որ այս կարգը կարող էր կիրառվել բացառապես մյուս տարվա համար, քանի որ այն հաստատվել է ընդունելության քննությունները սկսելուց ավելի ուշ»։

Բողոքի ակցիան հսկող ոստիկաններից մեկը քիչ առաջ հայտարարեց, որ ԿԳՄՍ նախարարության առաջ կատարվող գործողություններն այս պահին դիտվում են որպես հավաք և բողոքի ցույցի մասնակիցներին ներկայացրեց հավաքը դադարեցնելու վերաբերյալ օրինական պահանջ։ Բողոքի ցույցի կազմակերպիչը սակայն հակադարձվելով ոստիկանի հայտարարությանը, տեղեկացրեց, որ սա ոչ թե հավաք, այլ բողոքի ակցիա է և երեխաները իրենց հետ միասին պայքարում են իրենց ոտնահարված իրավունքների համար. «Մեր երեխաներն ուզում են սովորել, մեր երեխաները բարձր գնահատականներ են ստացել և ոչ ոք իրավունք իրավունք չունի նրանցից խլելու իրենց սովորելու իրավունքը»,- լրագրողների հետ ճեպազրույցի ընթացքում ասաց բողոքի ակցիայի կազմակերպիչը։

Պատանիները վանկարկում էին, որ սովորել են ուզում ու փորձեցին նստացույց հայտարարել՝ նստելով փողոցում, սական ոստիկանները նրանց անմիջապես հեռացրին։

Աղբյուր` Փաստինֆո