Փաստ ինֆո

Վարդաշենի 6-րդ փողոց 66/1 շենքի ներկայացուցիչները քաղաքապետարանի շենքի առջև էին։ Պահանջում էին հանդիպում քաղաքապետարանից և ցանկանում ստանալ եզրակացություն, որը կապացուցեր, որ շենքը 4-րդ կարգի վթարային է։

«Հուսալի կամար» ՍՊԸ-ն եզրակացություն է ներկայացրել, ըստ որի բնակիչները պետք է անհապաղ տարհանվեն։ Քաղաքապետը, սակայն, ըստ բնակիչների՝ եզրակացությունը չի ստորագրում։ Բնակիչներն էլ պարզաբանում են ուզում։ 2015-2020 թվականին քաղաքապետարանը ժամկետ էր ներկայացրել, որ շենքը պետք է վերանորոգվի, բայց մինչև օրս ոչինչ չի արվել։ Բնակիչներն ասում են՝ որևէ մեկը չի եկել տեսնի շենքի վիճակը։

«Շենքի պատերը խոնավությունից փլվում են, անգամ տանիք չկա»,- ասում են բնակիչները ու հավելում, որ սեփական բյուջեով ամեն տարի նորոգում են բնակարանները։ Սեյսմոլոգիական ընկերությունն էլ երկու անգամ ստուգումներ է արել, փակցրել համապատասխան թերթիկներ, որոնք մեկ ամիս չանցած նորից պոկվում են։

Բնակիչները նախ դիմել են վարչապետին, հետո ուղարկվել քաղաքապետարան, այնտեղից էլ պետգույք։ Բնակիչների խոսքով 2019 թվականից քննարկում են արդյոք շենքը պետք է քանդել թե ոչ։ Միայն մի քանի տարի առաջ են իմացել, որ շենքը 3-րդ կարգի վթարային է, իսկ 2016 թվականից իրենց ունեցած փաստաթղթերով շենքը պետք է վերանորոգվեր։

«Մինչև օրս ոչ ոք քարը քարին չի դրել։ Բնակիչները պարբերաբար հիվանդանում են։ Աստված չանի կորոնավիրուսով պայմանավորված մեկուսանանք, մեկ սանհանգուցից ենք օգտվում, մեր վիճակը ո՞նց է լինելու»։

Սեյսմիկ կազմակերպությունը, որը շահել է քաղաքապետարանի սեյսմոլոգիական արդյունքների անցկացումը մինչ այս պահը տվել են եզրակացություն՝ որով շենքը 3-րդ կարգի վթարային էր, այսօր սակայն, պարզվեց, որ այն 4-րդ կարգի է։

Մանրամասները՝ տեսանյութում

Աղբյուր` Փաստինֆո