Փաստ ինֆո

ՀՀ նախկին փոխվարչապետ Արմեն Գևորգյանի փաստաբանը դատական կարգով կպահանջի քրեական գործ հարուցել իր պաշտպանյալի՝ սահմանը հատելն արգելելիս ոստիկանության ծառայողների գործողություններում առերեւույթ չարաշահումների դեպքի առթիվ։

Փաստաբան Էրիկ Ալեքսանյանը «Փաստինֆո»-ին տեղեկացրեց, որ դեպքի առթիվ քրեական գործի հարուցումը մերժելու ՀՔԾ քննիչի որոշման դեմ դատախազություն ներկայացված բողոքը մերժվել է եւ դատական կարգով կվիճարկվի քննիչի ու դատախազի որոշումների օրինականությունը։

Ըստ նրա՝ դատախազն իր որոշման մեջ նշել է, թե իբր դիմող կողմի բողոքն անհիմն է, սակայն որեւէ հակափաստարկ չի ներկայացրել, չի հիմնավորել փաստաբանի բողոքում մատնանշված փաստարկների չհիմնավորված լինելը։

Փաստաբանն արձանագրեց, որ դիմող կողմն իր բողոքում վկայակոչելով խնդրո առարկային վերաբերող մի շարք նորմատիվ-իրավական ակտեր, կատարել է դրանց մանրակրկիտ և օբյեկտիվ վերլուծություն, սակայն դատախազն իր որոշմամբ փաստացի չի կարողացել նույն իրավական հարցի վերաբերյալ հակառակը փաստող՝ ողջամիտ դիրքորոշում ներկայացնել։ Դատախազն, ըստ էության, կրկնել է քննիչի դիրքորոշումն առ այն, որ տվյալ իրադրության պայմաններում ոստիկանությունը հանդես է եկել ոչ թե որպես հետաքննության մարմին, այլ որպես ՍԷԿՏ համակարգ կառավարության որոշման սահմաններում տեղեկատվություն մուտքագրող մարմին, հետևաբար՝ տվյալ պայմաններում տեղեկատվությունը մուտքագրող աշխատակիցը չէր կարող ղեկավարվել ՀՀ քրեական դատավարության օրենսգրքով։

Ալեքսանյանը ցավով արձանագրեց, որ դատախազն, ինչպես և քննիչը փաստացի չի կարողացել ընկալել և ճիշտ մեկնաբանել խնդրո առարկային վերաբերող իրավական ակտերը և հանգել օբյեկտիվ եզրահանգման։ Նրա գնահատմամբ՝ դատախազի որոշումը չի հաղթահարում նախատեսված հիմնավորվածության և պատճառաբանվածության շեմը եւ դատարան ներկայացրած բողոքով պահանջել է վերացնել քրեական գործի հարուցումը մերժելու մասին ՀՔԾ քննիչի որոշումը և դրա օրինականությունը հաստատելու մասին դատախազի որոշումը։

Ավելի վաղ տեղեկացրել ենք, որ Արմեն Գևորգյանին ՀՀ սահմանը հատելը չթույլատրելու կապակցությամբ փաստաբան Էրիկ Ալեքսանյանը ՀՀ գլխավոր դատախազին հաղորդում էր ներկայացրել, որով խնդրել էր իրավական գնահատականի արժանացնել ՀՀ ոստիկանության քրեական հետախուզության գլխավոր վարչության ծառայողների գործողությունները, իսկ քրեական գործ հարուցելու առիթի օրինականության և հիմքերի բավարար լինելու դեպքում՝ հարուցել քրեական գործ: Սակայն ՀՀ գլխավոր դատախազությունը այնուհետև՝ նաև առաջին ատյանի դատարանը գտել էին, որ Ալեքսանյանի կողմից ներկայացված հաղորդումը վերացական է և չի պարունակում կոնկրետ տվյալներ՝ հանցագործության հատկանիշների մասին:

Երևանի ընդհանուր իրավասության դատարանի որոշման դեմ փաստաբանը վերաքննիչ բողոք էր ներկայացրել, որը 2020թ փետրվարի 18-ին բավարարվել էր՝ բեկանելով Երևանի ընդհանուր իրավասության դատարանի որոշումը՝ վարույթն իրականացնող մարմնին պարտավորեցնելով վերացնել Արմեն Գևորգյանի իրավունքների խախտումը։ ՀՀ գլխավոր դատախազ Արթուր Դավթյանը Վերաքննիչ դատարանի որոշման դեմ վճռաբեկ բողոք էր ներկայացրել, սակայն Վճռաբեկ դատարանը մերժել է վարույթ ընդունել բողոքը, ինչը նշանակում է, որ Վերաքննիչ դատարանի որոշումը մտել է օրինական ուժի մեջ և այդպիսով ՀՔԾ-ն պարտավոր էր նյութեր նախապատրաստել՝ պարզելու, թե արդյո՞ք ՀՀ նախկին փոխվարչապետ Արմեն Գևորգյանին՝ սահմանը հատելն արգելած ոստիկանության ծառայողների գործողություններում առկա են հանցագործության հատկանիշներ, թե ոչ։ ՀՔԾ քննիչը որոշում է կայացրել քրեական գործի հարուցումը մերժելու մասին՝պատճառաբանելով, թե ՀՀ ոստիկանությունը,, իբր իրավացիորեն ղեկավարվել է կառավարության որոշմամբ, ըստ որի՝ անձի ազատ տեղաշարժի վերաբերյալ համակարգ մուտքագրված սահմանափակումը կարող է հանվել բացառապես այն դեպքում, երբ առկա է վարույթն իրականացնող մարմնի որոշումը՝ խափանման միջոցը վերացնելու մասին։

Հեղինակ՝ Իզաբել Սահակյան

Աղբյուր` Փաստինֆո