Փաստ ինֆո

Երկու շաբաթից ավելի է անցել, ինչ ռեստորանային համալիրների, հանդիսությունների սրահների սեփականատերերը, աշխատակիցները, բողոքի ակցիա էին իրականացնում՝ պահանջելով իրենց ևս թույլ տալ գործունեություն ծավալել՝ պահպանելով անվտանգության կանոնները, սակայն աշխատակիցների ապագան դեռ մշուշոտ է։ Ճգնաժամը վաղուց հասել է ռեստորանային ոլորտ։

Հետո, սակայն պարզ դարձավ, որ արտակարգ դրության վերացումից հետո երկար ժամանակ ոլորտը կարող է դեռ չաշխատել։
Հանրային ոլորտի փորձագետ Աշոտ Բարսեղյանը «Փաստինֆո»-ի հետ զրույցում ասաց, որ ինքը սկսել է արտակարգ դրության պայմաններում կառավարության կողմից անհիմն երկարացման պատճառով հանրային սննդի և հարակից ոլորտների կորուստների գույքագրումը։

«Միայն մեկ ռեստորանային համալիր ունի մոտավորապես 2.000.000 դոլարի պատվերների չեղարկում։ Միայն մեկ միջոցառումների զարդարման գործակալություն ունի մոտավորապես 1.000.000 դոլարի շրջանառության կորուստ»,- ասաց Բարսեղյանը, նշելով, որ կորուստները գրանցվել են մայիսից, ու եթե թիվը գումարվի, ապա սարսափելի արդյունքներ կունենանք։

Բարսեղյանը գույքագրումը սկսել է՝ կարծելով, որ միջոցառումների անցկացման ոլորտը փակելը անտրամաբանական է, իսկ իրավաբանները կարծում են, որ այն թույլ հիմքեր ունի։ Պետությունից պահանջելու են կտրուկ քայլեր ոլորտի օժանդակության մասով կամ փոխհատուցում։

Դրա համար էլ սկսել են գույքագրել հասցրած վնասները։

Իսկ ռեստորանային ոլորտի աշխատակիցները օդում կախված վիճակում են, ոչ ոք չի աշխատում։ Ռեստորանների տնօրենները փորձում են աշխատավարձի տեսքով հատուցում տալ։

«Հազարավոր մարդիկ աշխատում են նույն վայրում հազարավոր մարդիկ օգտվում են նույն տրանսպորտից՝ իրար հետ։ Տրամաբանական փաստարկներ չկան»,- ասաց Աշոտ Բարսեղյանը։

Աղբյուր` Փաստինֆո