Փաստ ինֆո

Ռուս-իսրայելական առեւտրաարդյունաբերական պալատի ղեկավար էլի Գերվիցը գնահատել է Իսրայելի EastMed գազատարի շինարարության հեռանկարը: Այս մասին հայտնում է ՌԻԱ Նովոստի - ն։

Փորձագետի խոսքով՝ Իսրայելի ծրագրերը չեն հարվածելու՝ Մոսկվայի հետ Թել Ավիվի տնտեսական փոխգործակցությանը։ «Ես չէի փորձի հակադրել Իսրայելին եւ Ռուսաստանին այս համատեքստում։ Մենք ապրում ենք բազմաչափ աշխարհում, որը շատ է տարբերվում «յուրային — օտար» մոդելից», — ասել է նա։ Գերվիցը նաեւ կասկած է հայտնել այն, որ EastMed նախագիծը կյանքի կկոչվի մինչեւ 2025 թվականը:

Փորձագետը հավելել է, որ Թել Ավիվի եւ Մոսկվայի միջեւ հարաբերությունները «բուռն են զարգանում եւ բուռն կերպով կշարունակեն զարգանալ»: «Ռուսաստանի եւ Իսրայելի տնտեսական փոխհարաբերությունների մակարդակն այժմ պետք է չափել ոչ թե միլիարդավոր դոլարներով, որոնց ծավալը կարող է ենթակա լինել արտաքին գործոններին՝ օրինակ, կորոնավիրուսի, այլ վեկտրով եւ տրամադրվածությամբ», — ընդգծել է Գերվիցը:

Իսրայելը տարեսկզբին եռակողմ համաձայնագիր է ստորագրել Կիպրոսի եւ Հունաստանի հետ Արեւելա-Միջերկրածովյան գազատարի (EastMed) կառուցման մասին, որը թույլ կտա գազ ուղարկել իսրայելական «Լեւիաֆան» հանքավայրից եւ կիպրոսյան «Աֆրոդիտայից» մայրցամաքային Եվրոպա: Սակայն աշխատանքները սկսելու համար անհրաժեշտ է ստանալ Իտալիայի ստորագրությունը։

Շինարարության մեջ ներդրումները գնահատում են վեց միլիարդ եվրո, իսկ նախագծի հզորությունը կկազմի տարեկան 10 միլիարդ խորանարդ մետր գազ՝ տարեկան մինչեւ 20 միլիարդ խորանարդ մետր հնարավոր ավելացմամբ: Նախագիծը կարող է այլընտրանք դառնալ «Հյուսիսային հոսք-2» - ին՝ դեպի Եվրոպա գազ մատակարարելու մասով։

Աղբյուր` Փաստինֆո