Փաստ ինֆո

ԿԳՄՍ նախարարությունը՝ ԿԳՄՍ նախարարի գլխավորությամբ, չի ցանկանում լուծում տալ մեր զավակների, դիմորդների իրավական պահանջին, այն է՝ ապահովել բուհում սովորելը և այդ իսկ պատճառով որոշում ենք կայացրել՝ մեր երեխաների իրավական պահանջը դատական ատյաններ ներկայացնելու մասին։ Այս մասին հրավիրված ասուլիսին ասաց բուհեր չընդունված դիմորդների ծնողների ներկայացուցիչ Մասիս Բաբալյանը։ 

Նա հայտնեց, որ հանդիպում են ունեցել ԿԳՄՍ փոխնախարար Գրիշա Թամրազյանի հետ և պարզվել է, որ ԿԳՄՍ նախարարությունը չի ցանկանում ընդառաջ գնալ իրենց ներկայացրած առաջարկություններին, ինչի հետևանքով իրենք փոխել են իրենց մարտավարությունը։

«Մենք շարունակելու ենք մեր ակցիաները և պահանջելու ենք, որ վերականգնվի մեր երեխաների սովորելու իրավունքը, քանի որ որոշ պետական այրերի կողմից այն խլվել է, այն ոտնահարվել է։ Ուզում եմ նշել, որ մեր շարժման ընթացքում մի շարք կազմակերպություններ, մի շարք անհատներ զանգերով, իրենց անձնական մոտեցումներով հիշեցրել են մեզ, որ սատարում են մեր շարժմանը և պատրաստ են աջակցելու բոլոր այն հարցերում, որի կարիքը մենք կունենանք»,- նշեց նա։

Նրա փոխանցմամբ՝ երկուշաբթի օրը ԿԳՄՍ նախարարության շենքի մոտ ակցիա են կազմակերպելու և պահանջելու են հանդիպում նախարարի հետ, քանի որ, ըստ նրա, նախարարը հանձնարարել է փոխնախարար Գրիշա Թամրազյանին, որ վերջինս փորձի իրենց համար նախընտրելի տարբերակները, մասնավորապես՝ առաջարկվում է դիմել հեռակա ուսուցում, մինչդեռ բոլորին է հայտնի, որ հեռակա ուսուցման համար քննությունները լինում են օգոստոսին և դիմորդներն իրենց գնահատականներով կարող են մասնակցել այդ քննություններին ։

«Դառնում են, կոպիտ ասած, մեզ ձեռք արած։ Կարծես թե մենք լուսնից ենք իջել, ոչնչից տեղյակ չենք, իսկ իրենք փորձում են լուծում տալ մեր խնդրին՝ առաջարկելով հեռակայի տարբերակը։ Ուրեմն, պարոն ԿԳՄՍ-ի նախարար Արայիկ Հարությունյան, ուշադիր հետևեք մեզ, մեր ելույթներին և փորձեք ճիշտ մոտեցում ցուցաբերել։ Դուք հիշեք, որ Ձեր այս անտարբեր քայլերով փորձում եք խեղաթյուրել մեր երեխաների ճակատագրերը, Դուք փորձում եք այս ամենով վատ անդրադառնալ մեր երեխաների ապագայի հետ կապված բոլոր հարցերի հետ։ Մեր դիմորդների մի մասը տղաներ են, որոնք կամ այս պահին բանակում են, կամ այս քանի օրերին են զորակոչվելու, կամ դեկտեմբեր ամսին են զորակոչվելու։ Դուք պատկերացնու՞մ եք իրենց վիճակը, թե ինչ է լինելու, եթե մարդը գիտի, որ բարձր գնահատական է ստացել, ամիսներ շարունակ, բազմաթիվ դիմորդներ երկու տարի չարչարվել են, տանջվել են և չարչարվող, տանջվող դիմորդի համար իր տարիքի սահմանում կյանքի նպատակ է հանդիսանում իր երազած մասնագիտության տեր դառնալը և իրենք, ստանալով բարձր գնահատականներ, բնականաբար համոզված են լինում այդ պահին, որ ընդունված են և անցնում է մի քանի օր և պարզվում է, որ կամ ոչ մի տեղ չեն ընդունվել, կամ վերջին հայտով մի տեղ է ընդունվել, ընդ որում՝ կարծելով, որ պետք է բոլոր հայտերը լրացնի։ Պարոն Արայիկ Հարությունյան, Դուք փորձեք այս խնդիրը լուծել, որովհետև այս ամենի մեղավորը և մենք, և մեր դիմորդ զավակներն առաջին հերթին Ձեզ են տեսնում »,- ասաց նա՝ հավելելով, որ նախարարը պարտավոր էր մայիսի 26-ին ստորագրված օրենքի մասին պատշաճ կերպով տեղեկացնել դիմորդներին։

Աղբյուր` Փաստինֆո