Փաստ ինֆո

Գյուղատնտեսական մթերքների արտահանման ծավալները նախորդ տարվա համեմատ երկու անգամ նվազել են։ «Փաստինֆո»-ի հետ զրույցում այս մասին ասաց «Ագրարագյուղացիական միավորում» ՀԿ նախագահ Հրաչ Բերբերյանը։

Վերջինս նշեց մի քանի պատճառ, որոնցից մեկը բնակլիմայական պայմանները, հորդառատ անձրևներն են, ինչպես նաև մեղվի քանակի պակասը, իսկ Հրաչ Բերբերյանի խոսքով փոշոտումն այստեղ ևս կարևոր դեր ունի։ Սնկային հիվանդություններ ևս կային, որի պատճառով ապրանքների տեսքը լավը չէր. «Ծիրանի քանակն այս տարի քիչ է եղել. Ընդամենը 15-16 հազար տոննա է արտահանվել անցյալ տարվա 27-28 հազարի և նախանցյալ տարվա 45 հազարի փոխարեն։ Ընդհանուր պտղի ծավալը 25-27 տոկոսով պակասել է նախորդ տարվա 45-ի փոխարեն, այսինքն գրեթե կրկնակի պակասել է»,-ասաց Հրաչ Բերբերյանը։

Նա նկատեց՝ գյուղացուն են մեղադրում, որ լավ չի աշխատում, բայց վարչապետը մոռացել է, որ մարզում՝ մարզպետարանում մոտ 100 պետական ծառայող կա, որ գյուղացուն որևէ խորհրդատվություն չի տվել. ««Ագրարագյուղացիական միություն» ՀԿ-ն է խորհրդատվություն տվել գյուղացիներին, բայց մի գիծ ունեինք ընդամենը։ Ասել էինք, որ շատ հիվանդություններ կան, որոնք պետք է տեղում նայենք, բայց գյուղացիները նաև հեռախոսով էին նկարում, ուղարկում և դիագնոստիկա էինք անում։ Բնականաբար խորհրդատվության պակասն էլ էր խնդիրը։ Եթե լավ կազմակերպեինք, այսինքն պետությունն իր ֆունկցիան լավ կատարեր, որի համար գումարներ է ծախսում, փոշիացնում, բնականաբար այսօր 30 տոկոս ավել բերք կունենայինք։ Բանջարեղենը նույն վիճակում է, անասնակերը թանկ է, որի համար կունենանք գլխաքանակի անկում»,-ասաց Հրաչ Բերբերյանը։

«Ագրարագյուղացիական միություն» ՀԿ նախագահը գտնում է՝ գյուղատնտեսական ապրանքի պակասի պատճառով էլ այսօր շուկայում ունենք բարձր գներ, այդ թվում ծիրանը, որի գինը 600 դրամից չիջավ։

Հարցին՝ մյուս տարի խնդրից խուսափելու համար կառավարությունն ինչ պետք է անի, Հրաչ Բերբերյանն ասաց. «Մյուս տարի պարոն Փաշինյանը որոշել է ԱՄՆ-ից մասնագետներ բերի, որոնք կյանքում ծիրանի ծառեր չեն տեսել։ Պարզ է՝ այդ մասնագետներն էլ 10-20 հազար դոլար աշխատավարձ կստանան։ Վարկ կվերցնեն, նրանց աշխատավարձ կտան ու այդպես»,-ասաց Հրաչ Բերբերյանը՝ ընդգծելով, որ եթե ուզում են գյուղատնտեսությունը լավ զարգանա, պետք է հիմա պատրաստվեն հաջորդ տարվա համար, սակայն Հրաչ Բերբերյանի խոսքով այս տարվա համար բան չեն արել, հաջորդ տարվա համար ի՞նչ պետք է անեն։

Անդրադառնալով հարցին՝ Էկոնոմիկայի նախարարության աշխատանքը գյուղատնտեսության գծով չի՞ արդարացնում, Հրաչ Բերբերյանն ասաց, որ նախարարը շատ լավ մասնագետ ու տնտեսագետ է, բայց նախարարությունում գյուղատնտեսության բաժինն ընդամենը մեկ վարչություն է։ Մասնագետը գտնում է՝ Գյուղատնտեսության նախարարությունը պետք է վերականգնեն։

Աղբյուր` Փաստինֆո