Փաստ ինֆո

«Այն հայեցակարգը, որ դրված է շրջանառության մեջ, արմատապես պետք է մերժվի, սա այն դեպքը չէ, որ կարելի է կոսմետիկ ուղղումներով շտկել։ Սա ազգային արժեքներից կտրված, դպրոցին ու աշակերտին ոչինչ չտվող ծրագիր է»,- «Փաստինֆո»-ի հետ զրույցում նման կարծիք է հայտնել գրականագետ Դավիթ Գասպարյանը՝ նշելով, որ այս հայեցակարգն անելիք չունի մեր դպրոցներում։

Նրա գնահատմամբ՝ այս ծրագրում ամեն ինչ իրար է խառնվել՝ և՛ ժամանակագրությունը և ՛հեղինակային կազմը, և՛ հայ գրականության պատմական զարգացման օրինաչափությունների ուսուցումը»։

«Ի՞նչ է նշանակում դպրոցական ծրագրից հանել Խորենացուն, Նարեկացուն, Քուչակին,- հարց է բարձրացնում գրականագետ Դավիթ Գասպարյանն ու ինքն էլ պատասխանում հարցին,- սա նշանակում է ջնջել ազգային հիշողությունը, բնաջնջել հայ մարդուն, սա նշանակում է թուրքի նման վարվել ապագա հայ սերնդի հետ»։

Հիշեցնենք, որ ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել հանրակրթության պետական առարկայական չափորոշիչների և օրինակելի ծրագրերի նախագիծը։ Նախագծում ներառված են «Հայոց լեզու», «Գրականություն», «Մայրենի», «Հայոց պատմություն», «Համաշխարհային պատմություն», «Հասարակագիտութուն», «Ես և իմ հայրենիքը», «Ֆիզիկական կուլտուրա», «Շախմատ», «Նախնական զինվորական պատրաստություն», «Օտար լեզուներ», «Մաթեմատիկա», «Թվային գրագիտություն և համակարգչային գիտություններ», «Ֆիզիկա», «Քիմիա», «Կենսաբանություն», «Աշխարհագրություն», «Բնագիտություն», «Բնություն», «Ես և շրջակա աշխարհը», «Տեխնոլոգիա», «Արվեստ», «Կերպարվեստ», «Երաժշտություն» առարկաների չափորոշիչներն ու օրինակելի ծրագրերը։

Հանրակրթական դպրոցում «Գրականություն» առարկայի նոր չափորոշիչների ծրագրերի նախագծում հանվել է «Հայ Գրականություն» առարկայի «հայ» բառը: Ծրագրից դուրս է մնացել ողջ Ոսկեդարն ու Միջնադարյան հայ գրականության նմուշները։ Ըստ հայեցակարգի հեղինակների կամայական նախընտրության, դպրոցական կրթական ծրագրից դուրս են մնացել ՝ Մաշտոցի, Նարեկացու, Շնորհալիի, Քուչակի, Սայաթ-Նովայի ստեղծագործությունները։ Հանրակրթության հայոց լեզվի և գրականության չափորոշիչ և ծրագիր մշակող հանձնախմբի համակարգող Թամարա Ալեքսանյանը «հայ» բառը գրականության առարկայից հանելու որոշումը մեկնաբանում է այսպես՝ քանի որ առարկայում հայ գրականությանը զուգահեռ տեղ են գտել նաև արտասահմանյան, համաշխարհային գրականությունը, ապա «հայ» բառը նպատակահարմար է գտնվել հեռացնել։ Վերջինիս կարծիքով առարկայի վերաբերյալ փոփոխություննները քննարկման առարկա են դարձել այն պատճառով, որ ոչ բոլոր ուսուցիչներն են պատրաստ գրականության ցանկի փոփոխություններին։

Մասնագիտական ամենատարբեր շրջանակներ նախօրեից սկսած ահազանգ են հնչեցնում՝ հայրենի կրթության ոլորտում ծայրաստիճան տագնապալի գործընթացներ են տեղի ունենում, մասնավորապես՝ դպրոցական կրթական բովանդակության պարագայում, որից, կարծես թե, բավական ընտրողաբար դուրս է բերվում հենց այն, ինչ նպաստում է աճող սերնդի ազգային ինքնության ձևավորմանը։ Այլ կերպ ասած, կրթության ոլորտի այս փոփոխությունները, մասնագետների գնահատմամբ կարելի է բնութագրել որպես կրթության ազգային համակարգի ոչնչացում։

Մանրամասները՝ տեսանյութում

Հեղինակ Նվարդ Մանվելյան

Աղբյուր` Փաստինֆո