Փաստ ինֆո

Կառավարության պահուստային ֆոնդից Տավուշի մարզպետարանին կտրամադրվի 25 մլն դրամ։ Համապատասխան նախագծին գործադիրը հավանություն տվեց այսօրվա նիստի ընթացքում։

Տարածքային կառավարման և ենթակառուցվածքների նախարար Սուրեն Պապիկյանը նշեց, որ Տավուշի մարզի սահմանամերձ համայնքներին հասցվել է շուրջ 150 մլն դրամի վնաս. «Առաջարկվում է հրատապության կարգով 25 մլն դրամ տրամադրել Տավուշի մարզպետարանին և հնարավորություն ստեղծել արագ վերականգնել հասցված վնասը»,-ասաց նախարարը։

ՀՀ վարչապետ Նիկոլ Փաշինյանն էլ նշեց, որ այս փուլում արագ գումար են հատկացնում, որպեսզի աշխատանքները սկսվեն՝ հետագա ավելի լայնածավալ աշխատանքներ իրականացնելու համար. «Կառավարության նախորդ նիստի դռնփակ հատվածում մենք քննարկում ունեցանք և եկանք այն եզարակացության, որ մենք սահմանապահ գյուղերում վարվող քաղաքականության հայեցակարգային փոփոխություն պետք է իրականացնենք։ Կարող էր տպավորություն ստեղծվել, որ կա կոնտեքստ, որ այդ գյուղերը, միևնույն է, գտնվում են գնդակոծման ուղիղ նշանառության տակ, հետևաբար այնտեղ տեղի ունեցող վերականգնման աշխատանքներն արվում էին մի փոքր այս տրամաբանությամբ։

Պետք է տրամաբանությունը փոխենք և սահմանապահ գյուղերը պետք է ոչ թե և ոչ միայն ուղղակի վերականգնվեն, այլև պետք է ունենանք այդ գյուղերի, բնակավայրերի զարգացման կոնկրետ քաղաքականություն, կոնկրետ ռազմավարություն։ Սահմանապահ գյուղերում Հայաստանը ոչ թե ավարտվում է, այլ սահմանապահ գյուղերից ՀՀ-ն սկսվում է»,-ասաց Նիկոլ Փաշինյանը։

Աղբյուր` Փաստինֆո