Փաստ ինֆո

Սյունիքի նախկին մարզպետ, «Լիսկա» մականունով հայտնի Սուրիկ Խաչատրյանի դեմ 2015թ տեղի ունեցած ենթադրյալ մահափորձի գործով ամբաստանյալ Հենրիկ Ավագյանի նկատմամբ քրեական հետապնդումը մասամբ դադարեցնվել է։ Սյունիքի մարզի ընդհանուր իրավասության դատարանը՝ դատավոր Նապելոեն Օհանյանի նախագահությամբ, բավարարել է Ավագյանի պաշտպան Լիանա Գրիգորյանի միջնորդությունը ու մեկ մեղադրանքի մասով գործի վարույթը կարճելու մասին որոշում կայացրել։

Ինչպես արդեն տեղեկացրել ենք՝ Հենրիկ Ավագյանին մեղադրանք է առաջադրվել երկու հոդվածով՝ ՀՀ Քրեական օրենսգրքի 235-րդ հոդվածի 1-ին մասով՝ ապօրինի զենք-զինամթերք պահելու, կրելու համար(երկու դրվագով) և նույն օրենսգրքի 34-104-րդ հոդվածի 2-րդ մասի 1-ին կետով՝ երկու կամ ավելի անձանց նկատմամբ սպանության փորձ կատարելու համար։

Ըստ փաստաբանի՝ Ավագյանն իրեն առաջադրված մեղադրանքն ընդունել է մասնակի՝ սպանության փորձի մեղադրանքը չի ընդունել, իսկ ապօրինի զենք-զինամթերքի մեղադրանքն ընդունել է։ Եվ երկրորդ մեղադրանքի մասով էլ քրեական հետապնդումը դադարեցվել է՝ վաղեմության ժամկետն անցնելու հիմքով։

Դատարանն արձանագրել է, որ նախատեսված արարքն ավարտվել է 2015 թվականի հուլիսի 3-ին և նշված հանցագործությունը կատարելուց հետո Հենրիկ Ավագյանի կողմից որևէ այլ հանցագործություն չի կատարվել:

Գործով մյուս ամբաստանյալի՝ Գարեն Աթաջանյանի պաշտպան Վահան Հովհաննիսյանի փոխանցմամբ՝ իր պաշտպանյալի նկատմամբ վաղեմություն չի կիրառվել, քանի որ առարկել են. մտադրված են հասնել արդարացման, քանի որ իր պաշտպանյալը որևէ հանցագործություն չի արել։

Նշենք, որ գործով դատաքննությունը գտնվում է ավարտական՝ ճառերի փուլում։ Հաջորդ դատական նիստին Գարեն Աթաջանյանի պաշտպան Վահան Հովհաննիսյանը կհրապարակի իր պաշտպանական ճառը։

Հիշեցնենք, որ մահափորձի ենթադրյալ դեպքը տեղի է ունեցել 2015թ մայիսի 20-ին՝ Կապան-Գորիս ավտոճանապարհին։ Անհայտ անձինք կրակոցներ են արձակել Սուրիկ Խաչատրյանի մեքենայի ուղղությամբ, սակայն մեքենայում գտնվող երեք անձինք, նրանց թվում՝ Սուրիկ Խաչատրյանը, չեն տուժել։ Այդ ժամանակ մամուլում շրջանառվող տեղեկությունների համաձայն՝ Սուրիկ Խաչատրյանի դեմ ոչ թե մահափորձ է եղել, այլ՝ մահափորձի բեմադրություն՝ հենց Խաչատրյանի կողմից։ Դեպքի առթիվ հարուցված քրեական գործի շրջանակներում մեղադրանք է առաջադրվել Հենրիկ Ավագյանին՝ երկու կամ ավելի անձանց նկատմամբ սպանության փորձ կատարելու և ապօրինի զենք-զինամթերք պահելու համար, իսկ Գարեն Աթաջանյանին՝ օժանդակության համար։

Հեղինակ՝ Իզաբել Սահակյան

Աղբյուր` Փաստինֆո