Փաստ ինֆո

Երրորդ օրն է ԲՈՒՀ չընդունված դիմորդները և նրանց ծնողները բողոքի ակցիա են անցկացնում, այս անգամ էլ Կառավարության շենքի մոտ են։ Ոստիկանները քաղաքացիներին խնդրեցին հեռանալ հավաքի վայրից, որովհետև գործողությունները օրենքից չի բխում։ Բողոքի ակցիայի մասնակիցները՝ պահպանելով սոցիալական հեռավորություն, շարունակում են ակցիան՝ գոչելով «Մենք ուզում ենք սովորել»։

«Ոտնահարվել է մեր երեխաների սահմանադրական իրավունքը։ Ամեն երեխա իրավունք ունի սովորելու, քննությունը մրցակցություն է։ Այն քննությունը, որ այս տարի է կատարվել, դա մրցակցություն չէ։ Նրանք մրցակցություն են տարել ճիշտ հայտեր լրացնելու պահով»,- այս մասին այսօր հայտնեց բողոքի ակցիայի կազմակերպիչը։

Ծնողը ասում է, որ փոխնախարարը իրենց խնդիրներին բավարարող ոչինչ չասաց։ Խնդրում են 2-4-րդ հայտով, եթե միավորի առումով բավարարում է, ապա տեղեր ապահովեն, որպեսզի երեխաները սովորեն։Ասում է՝ ԿԳՄՍ նախարարությունում գտնվելով տպավորություն էր , որ չեն ուզում ընդունել իրենց սխալը և ԳԹԿ-ի սխալը։

«Իրենց ասելով դա լիցենզավորման կարգի խախտում է, սա անընդունելի է։ Փոխնախարարը ոնց որ փափուկ բարձ փորձեր դներ մեր գլխի տակ։ Մինչև վերջ պայքարելու ենք, երեխաները պետք է դառնան ուսանող։ Վարչապետը մեր խնդրին լուծում կտա, խնդրեցի ներկայացնեն, որ կառավարության նիստից հետո վարչապետը ընդունի, եթե հնարավոր է։ Եթե հույս չունենանք այստեղ չենք լինի։ Դիմորդները ծանոթ են եղել նախկինում եղած կարգին, ինչ իմանային, որ երբ հայտը ներկայացրել են, կարգում 4 օր է փոփոխություն է եղել։ Փոխնախարարն ասում է՝ ի՞նչ 13.000 մարդու անհատական ծանուցագրեր ուղարկեինք, կես ժամ հեռուստատեսությամբ հայտնեինք։ Բա պետք լիներ մեկ ժամ էլ պետք է անեք, բա որ այդքան բարձր հավելավճարներ եք ստանում, դա ինչի՞ համար է»։

Հիշեցնենք, որ երեկ բողոքի մասնակիցները պահանջում էին հանդիպում ԿԳՄՍ նախարար Արայիկ Հարությունյանի հետ: Դիմորդների ծնողները բողոքում են, որ տեղյակ չեն եղել, որ նախապատվությունը տրվելու է առաջին հայտին, ոչ թե դիմորդի ստացած գնահատականին: Արդյունքում բարձր գնահատական ստացած բազմաթիվ դիմորդներ բուհ չեն ընդունվել:

Արայիկ Հարությունյանը և իր տեղակալները չէին ներկայացել ԱԺ-ում ԿԳՄՍ հանձնաժողովի նիստին։ Դիմորդները և նրանց ծնողները հանդիպել են Մարդու իրավունքների պաշտպանի հետ և ներկայացրել իրենց խնդիրը

Օրվա ավարտին եղավ նաև հանդիպում ԿԳՄՍ փոխնախարար Գրիշա Թամրազյանի հետ։ Քննարկման ժամանակ փոխնախարարը նշել է, որ անհնար է հավելյալ տեղեր հատկացնել դուրս մնացած 739 դիմորդների համար, հատկապես, որ այժմ լրացուցիչ փուլով դիմորդներից ավելի քան 550-ը հայտ է ներկայացրել՝ մասնակցելու թափուր տեղերի մրցույթին։ Հանդիպման մասնակից ծնողներից մեկը նշել է, որ այդ 550-ի մեծ մասը ստիպված է դիմել այդ քայլին՝ վերջին հնարավորությունից չզրկվելու համար։ Պայմանավորվածություն է ձեռք բերվել՝ նամակ-առաջարկ ներկայացնել ԿԳՄՍ նախարարություն։ Առաջարկվել է նաև, որ ԿԳՄՍ նախարարը այսօր Կառավարության նիստին ներկայացնի խնդիրը ու հնարավոր լուծումները:

Աղբյուր` Փաստինֆո