Փաստ ինֆո

Կառավարությունը, կարծեք թե, վտանգավոր խաղ է խաղում ՄԻԵԴ-ի հետ։ Հիմա էլ սկսել է ՄԻԵԴ-ի որոշումների մեկնաբանությունները տալ այնպիսի կտրվածքով, որ նորից նույն վիճակը լինի, ինչ կար։ «Փաստինֆո»-ի հետ զրույցում նման կարծիք արտահայտեց ՊԵԿ նախկին նախագահ, Ֆինանսների նախկին նախարար Գագիկ Խաչատրյանի փաստաբան Երեմ Սարգսյանը։

Հիշեցնենք, որ Մարդու իրավունքքների եվրոպական դատարանը հուլիսի 21-ին բավարարել է Գագիկ Խաչատրյանի դիմումը եւ միջանկյալ միջոց կիրառել ՝ ՀՀ կառավարությունից պահանջելով ապահովել նրա առողջական վիճակին համարժեք բուժում քաղաքացիական հիվանդանոցում։ Ինչպես «Փաստինֆո»-ն արդեն տեղեկացրել է՝ Գագիկ Խաչատրյանը դեռ ՔԿՀ-ում է ու նրան բուժօնգություն տրամադրելու ՄԻԵԴ որոշումը չի կատարվել։

Փաստաբանն ասաց՝ ՄԻԵԴ-ի որոշման մեջ կա կետ, որի համաձայն՝ վիրահատությունը պետք է Հայաստանում կատարվի, բայց նկատեց՝ հարց է, թե որքանով դա հնարավոր կլինի Հայաստանում կատարել. «Կառավարությունը դեռևս 15 օրվա մեջ պետք է ՄԻԵԴ-ին պատասխանի, թե այս ընթացքում ինչ միջոցներ ձեռնարկեց։ Եթե լսենք կառավարությանը, ուրեմն ստացվում է, որ Գագիկ Խաչատրյանը ո՛չ քաղաքացիական հիվանդանոց տեղափոխվելու կարիք ունի, ո՛չ վիրահատության կարիք ունի։ Այսինքն այդ դեպքում ի՞նչը բավարարեց ՄԻԵԴ-ը։ ՄԻԵԴ-ն ուղիղ պահանջ է դրել, որպեսզի համարժեք բուժմամբ ապահովեն Գագիկ Խաչատրյանին և հնարավորություն տան, որ վիրահատությունն արտասահմանյան մասնագետների կողմից կատարվի Հայաստանում։ Ուղիղ պահանջ չի դրել, որ թույլ տան Հայաստանից դուրս գնա։ Մեր խնդրանքը ՄԻԵԴ-ին եղել է այն, որ կառավարությանը պարտավորեցնի Գագիկ Խաչատրյանին հետ տեղափոխել քաղաքացիական հիվանդանոց և թույլ տալ մեկնի արտերկիր, որ վիրահատությունն այնտեղ կատարվի։ Բավարարել է և ասել, որ կառավարությունը պետք է ապահովի համարժեք բուժմամբ, բայց դա պետք է Հայաստանում կատարվի արտերկրից բերված մասնագետների կողմից։ Հիմա այս իրավիճակում ասել, որ որևէ պահանջ էլ չկա ՄԻԵԴ-ի կողմից, կարծում եմ՝ բավականին բացասական հետևանքներ կարող են լինել կառավարության համար»,-ասաց Երեմ Սարգսյանը։

Վերջինս նշեց, որ դեռ 2018թ.-ից համապատասխան փաստաթուղթ կա, որ այս հիվանդության պայմաններում նույնիսկ գործիքակազմի առկայության դեպքում այստեղ չեն կարող այն կարգի վիրահատություն կատարել, որ կյանքին վտանգ չսպառնա։ Երեմ Սարգսյանն ընդգծեց՝ իրենց գերխնդիրը ոչ թե Հայաստանից մեկնելն է, այլ վիրահատության իրականացումը. «Եթե այս տրամաբանությամբ պետք է ղեկավարվեն, որ ոչ հիվանդանոց տեղափոխելու կարիք կա, ոչ էլ վիրահատության կարիք կա, միայն ցավազրկողներ, եթե սա են գտնում համարժեք բուժում, կարծում եմ՝ բավականին վատ սցենար է իրենց համար։ Երբ ասում են՝ մշտապես բուժօգնություն է ստացել, նրանք պարբերաբար շփոթում են բուժզննությունը բուժման հետ։ Ամեն առավոտյան ՔԿՀ-ում բժիշկը մոտենում է ու չափում ճնշումը, չափում է ջերմությունը, հարցնում է՝ ինչ անհանգստություններ ունի, ցավեր ունի և պարզելով, որ մշտական ցավեր ունի, ասում են՝ լավ շարունակեք ցավազրկողները խմել ու համարում են, որ սա բավարար բուժում է։ Մինչև հիմա սա են իրենք անում։ Հետևաբար համարժեք բուժում չի ստանում, ինչն էլ ՄԻԵԴ-ն արձանագրել է իր որոշմամբ»,-ասաց փաստաբանը։

Հարցին՝ ի՞նչ կլինի, եթե ՀՀ կառավարությունը չկատարի ՄԻԵԴ-ի պահանջը, Երեմ Սարգսյանն նկատեց՝ ՄԻԵԴ-ի որոշումները չկատարելը հանգեցնում է լուրջ պատասխանատվության և այս առումով կարծում է, որ կառավարությունը նման քայլի չի գնա. «Սկսել են ինչ-որ հնարքներով փորձել մանիպուլյացիաներ անել, որ այս պահանջը չկա, այն պահանջը չկա։ Սա ևս կգնահատվի ՄԻԵԴ-ի կողմից, բայց պետք է չմոռանալ, որ Գագիկ Խաչատրյանի կալանքի ոչ իրավաչափ լինելու մասով հիմնական բողոք ունենք ներկայացրած։ Այդ բողոքները քննարկվում են տարիների ընթացքում, բայց Գագիկ Խաչատրյանի գործով տրվել է առաջնահերթություն, ինչը նշանակում է, որ կարճ ժամկետում պետք է քննվի։ Իրենք էլ են պատկերացնում, որ եթե առաջնահերթություն է տրվել, նշանակում է ՄԻԵԴ-ը տեսել է դրա հրատապությունը»,-ամփոփեց Երեմ Սարգսյանը։

Հավելենք, որ «Փաստինֆո»-ն այս հարցով ցանկանում էր զրուցել նաև ՄԻԵԴ-ում ՀՀ ներկայացուցիչ Եղիշե Կիրակոսյանի հետ, ով սակայն չի պատասխանում մեր հեռախոսազանգերին, թեեւ մինչ այդ հայտնել էր հարցազրույց տալու պատրաստակամություն՝ առաջարկելով զանգել մեկ ժամից։

Ժամերն անցան բայց պարոն Կիրակոսյանի հեռախոսն այլեւս մեր համար անհասանելի էր։

Աղբյուր` Փաստինֆո