Փաստ ինֆո

ԱԺ կրթության, գիտության հարցերի հանձնաժողովի աշխատանքային քննարկումն ավարտվեց։ 

«Փաստինֆո»-ի հետ զրույցում «Լուսավոր Հայաստան» խմբակցության պատգամավոր Աննա Կոստանյանն ասաց, որ քննարկմանն ակնկալում էին տեսնել նաև ԿԳՄՍ նախարարին կամ փոխնախարարներից որևէ մեկին, սակայն չէին ներկայացել. «Նախարարությունից որպես ներկայացուցիչ ԲՈՒՀ-ական մասով բաժնի վարիչ պարոն Սուքիասյանը և ԳԹԿ-ից ներկայացուցիչ։ Հանձնաժողովի նիստին հրավիրվել էին հիմնականում նախարար և փոխնախարար, որպես որոշում կայացնող մարմին այս հարցը որոշակիորեն փոխզիջումների կամ հնարավոր լուծումների գնայինք։ Այսինքն այս պահին քննարկումների արդյունքում, եթե որոշակի լուծումներ լինեին, հենց այս պահին որոշումը կայացվեր, որը հետագայում արդեն կկայացվեր չընդունված դիմորդների վրա, ինչը չեղավ, որովհետև նախարարության ներկայացուցիչը եկել էր՝ արդարացնելու այն խնդիրը, որն այս պահին ծագել է»,-ասաց պատգամավորը՝ ընդգծելով, որ այս պահին առարկայական որևիցե լուծում չունեն։

Պատգամավորը նշեց, որ խոսել են նաև այն մասին, թե որտեղից է խնդիրը ծագել։ Նրա խոսքով խնդիրը ծագել է ԲՈՒՀ ընդունվելիս մեկ առարկայից քննություն հանձնելուց պայմանավորված. «Պատշաճ իրազեկվածություն չի եղել դիմորդների և ծնողների շրջանում, ինչի վրա վերջին երկու օրերին շեշտադրում է արվում։ Այսինքն տեղյակ չեն եղել, որ նույնիսկ 8 հայտ նշելու դեպքում գերակայություն է տրվելու առաջին հայտով միավորներ հավաքած դիմորդներին, ինչը ստեղծել է այս աբսուրդային իրավիճակը։ Նախարարության և ԳԹԿ ներկայացուցիչն անընդհատ շեշտադրում են անում, որ մեզ անհրաժեշտ են դիմորդներ, հետագայում ուսանողներ, որոնք դիմելուց առաջ սթափ գիտակցում են, թե ինչ մասնագիտություններով են ուզում առաջնորդվել, բայց այստեղ մեկ հանգամանք հաշվի չեն առել, որ կորոնավիրուսով պայմանավորված հաստատ իրավիճակից օգտվողներ էլ եղել են և քանի որ մարտ ամսից մոտավորապես հայտնի էր, որ մեկ առարկայով է քննություն լինելու, բնականաբար այս ընթացքում հնարավորություն են ունեցել օրինակ տվյալ առարկան ավելի լավ սերտելու»,-ասաց պատգամավորը։

Աննա Կոստանյանը ենթադրում է, որ այս հարցով այլ քննարկումներ էլ կլինեն, որովհետև ԿԳՄՍ և ԳԹԿ ներկայացուցիչներին ներկայացրել են բոլոր մտահոգությունները և խնդրի լուծման առաջարկվող տարբերակները. «Անընդունելի է, որ մոտ 700-ից ավել երեխա այս պահին դուրս մնա։ Իրենք էլ ասացին, որ այս պահի տվյալներով 500 և ավելի դիմորդներ համաձայնել են դիմելու այլ մասնագիտություններով։ Չգիտեմ՝ դա որքանով արդյունավետ կլինի, օրինակ երեխային, որն ուզում է իրավագիտությամբ ուսում ստանալ, իրեն արևելագիտության բաժնում են հնարավորություն տալիս ուսումը շարունակելու»,-հավելեց պատգամավորը։

Հիշեցնենք, որ այս պահին ԱԺ շենքի դիմաց բողոքի ակցիա են իրականացնում ԲՈՒՀ չընդունված դիմորդները և նրանց ծնողները։
Վերջիններս բողոքում են, որ տեղյակ չեն եղել՝ նախապատվությունը տրվելու է առաջին հայտին, այլ ոչ թե դիմորդի ստացած գնահատականին։ Արդյունքում բարձր գնահատական ստացած դիմորդը ԲՈՒՀ չի ընդունվել։

Հեղինակ՝ Հասմիկ Կոշկարյան

Աղբյուր` Փաստինֆո