Փաստ ինֆո

ՊԵԿ նախկին նախագահ, Ֆինանսների նախկին նախարար Գագիկ Խաչատրյանի խափանման միջոցի փոփոխման հարցը պետք է պետությունը նախաձեռնի՝ ի դեմս այն մարմինների, որոնք դրա պատասխանատվությունն ունեն։ Նման պահանջ սահմանել է ՄԻԵԴ-ը։ Այս մասին «Փաստինֆո»-ի հետ զրույցում ասաց Գագիկ Խաչատրյանի փաստաբան Երեմ Սարգսյանը։

Նշենք, որ Մարդու իրավունքների եվրոպական դատարանը բավարարել է Գագիկ Խաչատրյանի դիմումը՝ ՀՀ կառավարությունից պահանջելով ապահովել Գագիկ Խաչատրյանի առողջական վիճակին համարժեք բուժում քաղաքացիական հիվանդանոցում։

«Ընդ որում խոսքը չի գնում միայն քաղաքացիական հիվանդանոց տեղափոխելու մասին։ Խոսքը գնում է համարժեք բուժում ապահովելուն։

Մայիսի 22-ին Գագիկ Խաչատրյանին «Աստղիկ» ԲԿ-ից անօրինական կարգով տեղափոխեցին քրեակատարողական հիմնարկ և դրանից հետո մինչ օրս նա որևէ բուժում չի ստացել, մենք բազմաթիվ դիմում-բողոքներով, պահանջներով խնդրում էինք, որ հետ տեղափոխեն, բուժումն ապահովեն, ինչը չէր արվում պետության կողմից։ Ստիպված դիմեցինք ՄԻԵԴ ու այն բավարարեց մեր դիմումը»,-ասաց Երեմ Սարգսյանը։

Փաստաբանը նշեց, որ այս պահին Գագիկ Խաչատրյանին քաղաքացիական հիվանդանոց տեղափոխելու վերաբերյալ տեղեկություն չունի, քանի որ ՄԻԵԴ-ի որոշման հրապարակումից դեռ կարճ ժամանակ է անցել։

«Խիստ կասկածում եմ, որ չեն կատարի ՄԻԵԴ-ի պահանջը և եթե չկատարեն, դա ավելի լուրջ բաների մասին կխոսի, քան հիմա ինչ-որ կատարվում է Գագիկ Խաչատրյանի գործի շուրջ։ Ամեն դեպքում գրեթե վստահ եմ, որ կկատարեն»,-ասաց Երեմ Սարգսյանը։

Հիշեցնենք, որ ՀՀ ֆինանսների նախկին նախարար Գագիկ Խաչատրյանն մեղադրվում է 2008-2014թթ. պետական գործունեության ընթացքում թույլ տված ենթադրյալ պաշտոնեական դիրքի չարաշահման և գույքի վատնման գործով։ Խաչատրյանը չի ընդունում իրեն առաջադրված մեղադրանքը, նա կալանքի տակ է գտնվում շուրջ 11 ամիս եւ այս ամիսների ընթացքում փաստաբանական թիմը բարձրաձայնել է տասնյակ իրավախախտումների ու ճնշումների, այդ թվում նաև Խաչատրյանի որդիների նկատմամբ ապօրինի ու իրավական տրամաբանությունից դուրս հետապնդման մասին։ Ճնշումները, ապօրինի խուզարկություններն ու հետապնդումները դրսևորվել են նաև ընտանիքի այլ անդամների ու հարազատների նկատմամբ։

Նշենք, որ Գ.Խաչատրյանն ունի հենաշարժողական խնդիրներ,եւ նրանց ցոցված է անհապաղ վիրահատություն, սակայն առ այսօր պահվում է ՔԿՀ-ում։

Աղբյուր` Փաստինֆո