Փաստ ինֆո

ՀՀ նախագահը չի կատարել իր Սահմանադրական պարտականությունները։ Այս մասին «Փաստինֆո»-ի հետ զրույցում ասաց սահմանադրական իրավունքի մասնագետ, իրավաբանական գիտությունների թեկնածու, դոցենտ Վարդան Այվազյանը։

Նշենք, որ ՀՀ նախագահ Արմեն Սարգսյանը «Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին օրենքն ստորագրելու համար նախատեսված 21-օրյա ժամկետում այն չի ստորագրել եւ ոչ էլ դիմել՝ ՍԴ՝ օրենքի սահմանադրականության հարցը պարզելու համար։ Մինչդեռ՝ գործող իրավակարգավորումների համաձայն՝ Նշված ժամկետում օրենքը չստորագրելու դեպքում նախագահը պետք է դիմի ՍԴ՝ օրենքի Սահմանադրությանը համապատասխանության վերաբերյալ որոշում ստանալու, որն այս դեպքում չի իրականացվել։

Իսկ այսօր՝ հուլիսի 22-ին, հայտնի դարձավ, որ ԱԺ նախագահ Արարատ Միրզոյանը ստորագրել է օրենքը և այն ուժի մեջ կմտնի պաշտոնական տեղեկագրում հրապարակվելուց հետո։

Սահմանադրագետ Վարդան Այվազյանը «Փաստինֆո»-ի հետ զրույցում ասաց, որ նախագահը պետք է կամ ստորագրեր, կամ դիմեր ՍԴ և քանի որ չի դիմել ՍԴ, ստիպված ստորագրել է ԱԺ նախագահը։

«Նման ընթցակարգը բխում է նախագահի՝ իր պարտականությունները չկատարելուց։ Սահմանադրությամբ հստակ նշված է՝ նա կամ պետք է դիմեր ՍԴ, կամ ստորագրեր»,- ասաց Այվազյանը՝ նշելով, որ արդեն պետք է գնահատական տան իշխանության մյուս ճյուղերը։

Հարցին, թե նախագահի կողմից իր սահմանադրական պարտականությունները չկատարելու դեպքում պատասխանատվության ինչ մեխանիզմներ են նախատեսված, անվստահություն կարո՞ղ են հայտնել նախագահին, սահմանադրագետը պատասխանեց, որ անվստահություն հայտնելը ԱԺ լիազորությունն է, ընդ որում՝ այդ ընթացակարգը ևս պետք է անցնի ՍԴ-ով։

Դիտարկմանը, որ ստեղծված իրավիճակում, մասնավորապես, եթե ԱԺ կողմից նման հարց չբարձրացվի (խորհրդարանական մեծամասնությունն է ընդունել վիճարկվող օրենքը եւ վերջինս շահագրգռված է օրենքի գործողության մեջ մտնելու հարցում), ավելին՝ այս պահի դրությամբ փաստացի գործող ՍԴ չկա, Նախագահի կողմից իր սահմանադրական պարտականությունների չկատարումը կմնա անհետեւանք՝ սահմանադրագետը դրական արձագանքեց։

Հիշեցնենք, որ երկրի խորհրդարանական մեծամասնությունը հունիսի 22-ին հակասահմանադրական ճանապարհով՝ առանց ՍԴ դրական եզրակացությունն ստանալու, փոփոխություններ կատարեց երկրի մայր օրենքի՝ Սահմանադրության մեջ, որից օրեր անց հայտարարվեց, որ թե դադարել են ՍԴ երեք դատավորի՝ Ալվինա Գյուլումյանի, Ֆելիքս Թոխյանի եւ Հրանտ Նազարյանի լիազորությունները եւ նրանք պետք է անհապաղ վայր դնեն՝ Բարձր դատարանի դատավորի լիազորությունները։ Նշենք, որ «Սահմանադրական դատարանի մասին» ՀՀ սահմանադրական օրենքի 8-րդ հոդվածում ամրագրված էր Սահմանադրական դատարանի դատավորի անփոփոխելիության սկզբունքը, ինչը դատական իշխանության անկախության երաշխիքներից մեկն էր։

Ընդ որում՝ ՍԴ դատավորների լիազորությունները դադարեցված համարվեցին՝ նախքան ՍԴ մասին օրենքում փոփոխություններ կատարելը, թեեւ հենց այդ օրենքով է կանոնակարգվում դատավորների լիազորությունների դադարեցման ու նշանակման կարգը։ «Սահմանադրական դատարանի մասին» սահմանադրական օրենքում փոփոխություններ կատարվեցին միայն հունիսի 30-ին, որն էլ այսօր ԱԺ նախագահը ստորագրել է։

Նկատենք, որ հունիսի 25-ից հետո Հայաստանում ձեւավորվել է սահմանադրական ճգնաժամ՝ տապալվել են ՍԴ նիստերը, չեն հրավիրվում աշխատակարգային նիստեր, ՍԴ մուտք եղած դիմումները մնում են անհետեւանք։

Հեղինակ՝ Իզաբել Սահակյան

Աղբյուր` Փաստինֆո