Փաստ ինֆո

Ինչո՞ւ են մայրաքաղաքում անվերահսկելի տեմպերով ավելացել թափառող, գազազած ու անխնամ շները, որոնք հաճախ հարձակվում են քաղաքացիների վրա, կծում մարդկանց, վախեցնում երեխաներին։ Սա դեռ բավական չէ, վերջին շրջանում թափառող շները մեծ խմբերով հայտնվում են մայրաքաղաքի ամենաբանուկ ու կենտրոնական հատվածներում, իսկ առավել ուշ ժամերին գազազած շների ոհմակներն այնպիսի աղմուկ են բարձրացնում գիշերային Երևանում, որ մարդիկ բողոքում են՝ քնել չկարողանալու և տանից  դուրս գալ չկարողանալու վտանգի մասին:

Պարզվում է գիշերային մղձավանջ հիշեցնող այս պատկերը պարզունակ պատասխան ունի: Այս մասին «Փաստինֆո»-ի հետ զրույցում հայտնում է Երևան քաղաքի ավագանու անդամ, «Լույս» խմբակցության ղեկավար Դավիթ Խաժակյանը: Ոչինչ անել չենք կարող՝ Երևանի քաղաքապետ Հայկ Մարությանի կինը՝ Իվա Մարությանը շատ է սիրում շներին, ասում է մեր զրուցակիցը: Այս կենդանիների նկատմամբ վերջինիս սերը ստվերել է անգամ մարդու իրավունքներն ու փաստորեն ստեղծվել է այնպիսի մի իրավիճակ, երբ կենդանիների իրավունքը վեր է դասվում մարդու հիմնարար իրավունքներից. «Վաղուց գաղտնիք չէ, որ քաղաքապետ Հայկ Մարությանի կինն ակտիվ ներգրավված է քաղաքապետարանի աշխատանքներում: Երկու հիմնարկ կա, որտեղ տնօրենների և ոչ միայն տնօրենների նշանակումներում Մարությանի կինն ուղիղ միջամտություն ունի՝ խոսքը կանաչապատման ՀՈԱԿ-ի և թափառող շների և կենդանիների վնասազերծման ՀՈԱԿ-ի մասին է:

Այստեղ նշանակումները Մարությանի կինն անում է իր մտերիմ ընկերուհու՝ Քրիստինա Վարդանյանի հետ խորհրդակցելով: Ու հիմա փաստորեն այս ամենը քիչ էր, վերցրին ու կանաչապատման հիմնարկի փոխտնօրեն նշանակեցին հենց այդ կնոջը՝ Քրիստինա Վարդանյանին: Այս ամենի աբսուրդն այն է, որ Մարությանը կնոջ ընկերուհուն բերում նշանակում է հսկա մի հիմնարկի՝ ամբողջ քաղաքաի կանաչապատման հիմնարկի փոխտնօերն, իսկ այս պահին գործող թափառող կենդանիների ՀՈԱԿ-ի տնօրենը նույն այդ Քրիստինայի մտերիմ մարդն է, իսկ հիմնարկի կանաչապատման մրցույթն էլ նույն տրամաբանությամբ անցկացրեցին:

Թե անունն ի՞նչ են դնում, որ ոլորտից կիլոմետրերով հեռու ինչ որ մեկին բերում դնում են հիմնարկի պատասխանատու պաշտոնում, ես չեմ հասկանում: Հավանաբար եթե միանգամից տնօրեն նշանակեին, շատ բացահայտ կլիներ, փոխարենը մրցույթով անցկացրին մեկին, որին առանց որևէ խնդրի հետագայում կարող են փոխարինել նույն Քրիստինայով: Այս կինն իր ոչ կեմպետենտ գիտելիքներով այնպես է միջամտում կանաչապատման աշխատանքներին, որի արդյունքն ակնհյատ է, ուղղակի պետք է նայել, թե ի՞նչ վիճակում է մեր քաղաքի տեսքը: Փաստացի, Հայկ Մարությանը որպես քաղաքապետ այս երկու ոլորտներում ոչ մի գործ չունի, նա նույնիսկ չի վերահսկում իրավիճակը՝ կնոջ և կնոջ ընկերուհու հույսին են»:

Անդրադառնալով թափառող կենդանների և մասնավորապես քաղաքացիների համար գլխացավանք դարձած թափառող շների թեմային, Դավիթ Խաժակյանը նկատում է.

«Թափառող կենդանիների ՀՈԱԿ-ը բացարձակ բարցիթողի վիճակում է: Դե պատկերացրեք, որ այնտեղ է «աշխատում» նաև Հայկ Մարությանի մտերիմ ընկեր, «Կարգին հաղորդման» կարծեմ սցենարիստ Աշոտ Մելոյանը, ով ո´չ ավել, ո´չ պակաս ստանձնել է Թափառող կենդանիների ՀՈԱԿ-ի լոգիստիկայի բաժնի ղեկավարի պաշտոնը: հիմա եկեք փորձենք պատկերացնել այս տեսարանը՝ Աշոտ Մելոյանը ղեկավարում է թափառող շների ՀՈԱԿ-ի լոգիստիկայի բաժինը… Այսինքն, ըստ էության, այդ բաժինը զբաղված է թափառող կենդանիներին բռնելով…և ինքը ղեկավարում է այդ աշխատանքը…

Արդյունքը պարզ տեսանելի է բոլորի համար, ի դեպ, թափառող շներն, իմ ունեցած տեղեկություններով, կարծեմ վերջին ամիսներին չեն էլ ստերջացվում: Այդ աշխատանքը դուրս է եկել վերահսկողությունից, այդ պատճառով էլ մենք տեսնում ենք, թե ինչքան շատ են թափառող շները մեր քաղաքում»:

Հեղինակ՝ Նվարդ Մանվելյան

Աղբյուր` Փաստինֆո