Փաստ ինֆո

Կոռուպցիայի կանխարգելման հանձնաժողովի կողմից Գագիկ Ծառուկյանի նկատմամբ հարուցած վարույթը պետք չէ ուղիղ իմաստով ընկալել, թե անձը կատարել է առերևույթ այդ գործողությունները։ Այս մասին «Փաստինֆո»-ի հետ զրույցում ասաց «Բարգավաճ Հայաստան» կուսակցության առաջնորդ Գագիկ Ծառուկյանի փաստաբան Էմին Խաչատրյանը՝ նշելով, որ եթե կա որևէ անձի կամ կազմակերպության դիմում, Կոռուպցիայի կանխարգելման հանձնաժողովը չունի օրենքով նախատեսված այլ ճանապարհ, քան վարույթ հարուցելը և քննություն իրականացնելը։

Հիշեցնենք, որ Կոռուպցիայի կանխարգելման հանձնաժողովը Գագիկ Ծառուկյանի նկատմամբ վարույթ է հարուցել՝ անհամատեղելիության պահանջի առերևույթ խախտման հիմքով: Ըստ հանձնաժողովի՝ վարույթ հարուցելու համար առիթ է հանդիսացել 2020 թվականի հունիսի 23-ի «Մուլտի Գրուպ» կոնցեռն ՍՊ ընկերության ընդհանուր ժողովի արձանագրությունը, որը ստորագրվել է Գագիկ Կոլյայի Ծառուկյանի կողմից՝ ընկերության տնօրեն Սեդրակ Առուստամյանի լիազորությունները դադարեցնելու և տնօրենի ժամանակավոր պաշտոնակատար Արայիկ Կեսոյանին նշանակելու մասին (որպես պատճառ՝ նշված է Սեդրակ Առուստամյանի կողմից իր պարտականությունների կատարման ժամանակավոր անհնարինությունը): Ըստ հանձնաժողովի ներկայացրած տեղեկատվության՝ Գ. Ծառուկյանն անձամբ առերևույթ մասնակցել է ընկերության կառավարմանը, առաջարկել է ընկերության տնօրենի թեկնածու, մասնակցել է տնօրենի ազատման և նոր տնօրեն նշանակելու որոշումների կայացման գործընթացին, ինչպես նաև տնօրենին հանձնարարականներ տալուն:

Էմին Խաչատրյանը պարզաբանեց՝ նշելով, որ «Մուլտի Գրուպ» կոնցեռնի տնօրենը և Գագիկ Ծառուկյանին սեփականության իրավունքով պատկանող ձեռնարկությունների հավատարմագրային կառավարիչը Սեդրակ Առուստամյանն է, ով քրեական գործերից մեկով գտնվում է կալանքի տակ, ինչի պայմաններում բիզնեսների կառավարումն անհնարին է դառնում և այդ պայմաններում Գագիկ Ծառուկյանն ուղղակի նոր տնօրեն է նշանակել և հավատարմագրել կառավարիչին, ինչի պայմաններում չի կարելի պնդել, որ Գագիկ Ծառուկյանն անձամբ մասնակցել է այդ բիզնեսների կառավարմանը կամ գոնե մեկ հատ կառավարչական գործառույթ է իրականացրել։ Փաստաբանի խոսքով՝ տվյալ պայմաններում այդ կազմակերպությունները պետք է արդյունավետ կառավարվեն, աշխատավարձներ բաժանվեն, գործարքներ կնքվեն և Սեդրակ Առուստամյանի ձերբակալությունից, ապա կալանավորումից հետո կազմակերպությունների բնականոն գործունեությունը խաթարվել է, իսկ Գագիկ Ծառուկյանը չի կարող մասնակցել կառավարմանը։

«Պարզ չէ՞, որ պետք է տնօրենին փոխի։ Դա չի նշանակում, որ անձը մասնակցել է կառավարմանը։ ո՛չ ուղղակի, ոչ անուղղակի ձևով անձը չի մասնակցել կառավարմանը։ Պարոն Առուստամյանը նախնական կալանքի տակ է և բոլորին պարզ է, որ դրա արդյունքում նա չի կարող կառավարման գործունեություն իրականացնել, ինչի պատճառով տուժելու են հազարավոր աշխատակիցներ, ում պետք է աշխատավարձ վճարվի, տուժելու է ձեռնարկության բնականոն գործունեությունը, որ պետք է պայմանագրեր կնքի, որոշակի գործառույթներ իրականացնի, հարկեր վճարի, որն իրավասու է անել տնօրենը, ԺՊ-ն, բայց իրավասու չէ անել պարոն Ծառուկյանը։ Այս պայմաններում պարոն Ծառուկյանի կողմից որևէ առերևույթ խախտում թույլ տրված չէ և պարոն Ծառուկյանը որևէ կառավարչական գործառույթ չի իրականացրել՝ ոչ անուղղակի, ոչ ուղղակի ձևով»,- ասաց Խաչատրյանը։

Հարցին, թե արդյո՞ք Գագիկ Ծառուկյանին մանդատից զրկելու նպատակ են հետապնդում, փաստաբանը պատասխանեց, որ որոշումը դեռևս չեն ստացել, սակայն նրա ներկայացմամբ, եթե Կոռուպցիայի կանխարգելման հանձնաժողովին որևէ տվյալ է հայտնի դառնում, որի հետ կապված պետք է քննություն կատարվի, պետք է վարույթ հարուցի, քանի որ օրենքով սահմանված այլ տարբերակ չկա։

«Վարույթ չհարուցելու, վարույթ հարուցելը մերժելու մասին օրենքով նախատեսված մեխանիզմ չկա։ Օրենքն ասում է՝ ամեն դեպքում հարուցիր վարույթ, վարույթի շրջանակներում կատարիր անհրաժեշտ քննություն և արի եզրահանգման։ Այստեղ վարույթ չհարուցելու տարբերակ չկա, իսկ վարույթ հարուցելու մեջ որևէ արտասովոր բան չկա, պետք է հարուցվի, մարդիկ իրենց աշխատանքն են անում»,- ասաց Խաչատրյանը։

Պաշտպանը համոզված է, որ Գագիկ Ծառուկյանին մանդատից զրկելու որևէ իրավական հիմք չկա, որովհետև Գագիկ Ծառուկյանն առերևույթ որևէ խախտում թույլ չի տվել և կառավարչական գոնե մեկ գործառույթ չի իրականացրել։

Հեղինակ՝ Իզաբել Սահակյան

Աղբյուր` Փաստինֆո