Փաստ ինֆո

Այս գործի քննությունը պետք է կասեցվի՝ մինչև վեթինգի ավարտը։ Այս մասին ՀՀ երկրորդ նախագահ Ռոբերտ Քոչարյանի և մյուսների գործով դատական նիստին ասաց պաշտպան Կարեն Մեժլումյանը՝ արձագանքելով պաշտպանական կողմի ներկայացրած դատակոչի ցուցակը լրացնելու մասին միջնորդությունների լուծումը հետաձգելու մասին դատարանի որոշմանը ։

«Քանի դեռ վեթինգ չի արվել և չի ավարտվել այդ պրոցեսը, այդ վեթինգը մեր դատավորների գլխի վերևին կախված «դամոկլյան սուր է», որովհետև որևէ դատավոր, որ կարող է կամ իրեն թույլ կտա այս միջնորդությունները բավարարել, որոշակի որոշում կայացնել՝ օբյեկտիվ, բազմակողմանի, մրցակցության սկզբունքն ապահովելու համար, կընկնի այս վեթինգի բացասական հետևանքների տակ։ Էլի միջնորդություններ կան, կներկայացնենք, բայց տպավորություն է, որ բոլոր դեպքերում քանի դեռ վեթինգը չի եղել, դատարանը գտնելու է, որ այն փուլը չէ»,- ասաց Մեժլումյանը։

Պաշտպան Հովհաննես Խուդոյանը ևս հայտարարությամբ հանդես եկավ՝ նշելով, որ դատարանին ներկայացված ապացույցների ծավալը սպառելը տարիների խնդիր է և հետաձգված միջնորդություններում նշված անձինք տարիքով մարդիկ են և հնարավոր է՝ երկու-երեք-տարի հետո այդ անձանց դատարան ներկայացնելն ուղղակի հնարավոր չլինի, առավել ևս, իր կողմից ներկայացվել է պատճառաբանություն, թե որքանով է կարևոր Մանվել Գրիգորյանի հարցաքննությունն այս գործում, մինչդեռ՝ որևէ մեկի համար գաղտնի չէ, որ Մանվել Գրիգորյանն ունի առողջական լուրջ խնդիրներ, որոնք կարող են կյանքի համար անհամատեղելի լինել։

«Դատարանն իր գործողություններով նպաստում է, որ գործով լրիվ, ամբողջական քննություն չիրականացվի»,- ասաց Խուդոյանը։
Հիշեցնենք՝ պաշտպան Հայկ Ալումյանը միջնորդել էր դատակոչված վկաների ցուցակում ընդգրկել նաեւ հետևյալ անձանց՝ 2008թ մարտի 8-ին ՀՀ ՍԴ նախագահի պաշտոնը զբաղեցրած Գագիկ Հարությունյանին, ինչպես նաև՝ դատավորներ Հրանտ Նազարյանին, Կիմ Բալայանին, Վլադիմիր Հովհաննիսյանին, Ֆելիքս Թոխյանին, ինչպես նաև՝ Սամվել Մայրապետյանին , ՀՀ ՊՆ նախկին նախարար Միքայել Հարությանյան։ Պաշտպան Միհրան Պողոսյանը միջնորդել էր դատակոչի ցուցակում ներառել նաև Գևորգ Կոստանյանին, Մանվել Գրիգորյանին, Տիգրան Կարապետյանին, Վահագն Հարությունյանին և Արմեն Հակոբյանին։ Պաշտպան Կարեն Մեժլումյանը միջնորդել էր Հովիկ Աբրահամյանին, Դավիթ Հարությունյանին, Արմեն Ռուստամյանին, Ավետ Ադոնցին և Արծրուն Աղաջանյանին որպես վկա հրավիրելու և հարցաքննելու համար։ Մեղադրող կողմը նշեց, որ Կարեն Մեժլումյանի միջնորդությունը ենթակա է մերժման, իսկ Հայկ Ալումյանի և Միհրան Պողոսյանի ներկայացրած միջնորդությունները տվյալ փուլում քննարկման ենթակա չեն։ Դատարանը որոշել է հետաձգել միջնորդությունների լուծումը։
Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո