Փաստ ինֆո

Իրեն հնազանդ ԱԱԾ ունենալու համար Նիկոլ Փաշինյանը քանդեց տարիներով կայացած համակարգը,- 168.am-ին տված հարցազրույցում հայտարարել է «Հայրենիք» կուսակցության նախագահ Արթուր Վանեցյանը։

Ադրբեջանի կողմից Տավուշի մարզի ուղղությամբ իրականացված ռազմական ագրեսիային զուգահեռ՝ հաքերային հարձակումներ կատարվեցին պետական կայքերի դեմ, տեղի ունեցավ մեր զինվորականների տվյալների արտահոսք, մեր ազգաբնակչության շրջանում հակառակորդի կողմից տարածվեցին խուճապ տարածող sms հաղորդագրություններ՝ վտանգի տակ դնելով մեր ազգային անվտանգությունը։ Պատասխանելով լրագրողի հարցին, թե ինչո՞ւ համակարգն այս աստիճան թերացավ՝ ԱԱԾ նախկին տնօրեն Ա.Վանեցյանը նկատել է. «Դեռ ժամանակ կունենանք վերլուծելու, թե ինչու համակարգը թերացավ։ Դուք թվարկեցիք թերացումների միայն երևացող կողմը, որն ամբողջական պատկերի մի փոքր մասն է ընդամենը։ Իսկ թերացման պատճառն առավել քան ակնհայտ է։ Իրեն հնազանդ ԱԱԾ ունենալու համար Նիկոլ Փաշինյանը քանդեց տարիներով կայացած համակարգը, ոլորտի պրոֆեսիոնալներն ու կենսագրություն ունեցող սպաները սկսել են լքել այն, դրա համար էլ ունենք այս պատկերը։

Անշուշտ, ԱԱԾ-ում այսօր էլ շատ պրոֆեսիոնալ կադրեր կան, բոլորն իմ նախկին կոլեգաներն ու ներկայիս ընկերներն են և իրենց ուսերին են պահում համակարգը, բայց երբ առողջ ու գործող օրգանիզմին օտար ու պրոցեսներից անտեղյակ «գլուխ են փոխպատվաստում», միշտ այսպես է լինում՝ հատկապես այնպիսի փակ ու հիերարխիկ համակարգերի դեպքում, ինչպիսին ԱԱԾ-ն է»։

Ա.Վանեցյանի խոսքերով՝ տավուշյան դեպքերը ևս մեկ անգամ ապացուցեցին, որ Հայաստանի համար թիվ մեկ առաջնահերթությունն անվտանգու¬թյունն է, և այդ ուղղությամբ հսկայական աշխատանք ունենք անելու։

«Ուզում եմ շեշտել, որ անվտանգության գաղափարը չի սահմանափակվում միայն զինված ուժերի մարտունակությամբ։ Ազգային անվտանգությունն ապահովվում է մի շարք ուղղություններով գրագետ, նպատակային, մշտական և հետևողական աշխատանքով։ Այս հարցերում մենք սխալվելու իրավունք չունենք։ Եվ դաշնակիցների հետ անկեղծ և վստահելի հարաբերություններն ամենակարևոր գործոններից մեկն է։ Եվ ես, ցավոք, տեսնում եմ, որ այս ու մի շարք այլ ուղղություններով թույլ են տրված սխալներ։ Չի կարելի անվտանգության ապահովման ողջ ծանրաբեռնվածությունը թողնել միայն բանակի վրա։ Երբ իշխանությունն աշխատանքի մյուս ուղղություններում ունենում է սխալներ, ապա բանակի վրա ծանրաբեռնվածությունն էապես մեծանում է»,- ընդգծել է նա։

Աղբյուր` Փաստինֆո