Փաստ ինֆո

«Ի գործ»՝ այս անունն է կրում ծրագիրը, որի շրջանակում առաջիկայում, ավելի ճշգրիտ՝ սեպտեմբերին ՀՀ իշխանությունն իր դռները կբացի 100 սփյուռքահայ բարձրակարգ մասնագետների առջև, որ նրանք վերադառնան հայրենիք և ներգրավվեն ՀՀ պետական կառավարման համակարգի աշխատանքներին:

Այս մասին ի տեղեկություն որպես հայտնեց երեկ ՀՀ վարչապետ Նիկոլ Փաշինյանը։

Նկատենք, որ դեռ թավշյա հեղափոխությունից անմիջապես հետո է Փաշինյանի իշխանությունը կառավարման համակարգում ներգրավել սփյուռքահայերի, ընդ որում, բարձր պաշտոններում: Մասնավորաբար, այդ համատեքստում կարելի է առանձնացնել քաղաքաշինության կոմիտեի ղեկավար Ավիկ Էլոյանի, սփյուռքի փոխնախարար Բաբկեն Տեր-Գրիգորյանի, վարչապետի աշխատակազմի գործերի կառավարիչ, «Կյանքի խոսք» աղանդի դավանորդ Գևորգ Աճեմյանի նշանակումները, որոնց պաշտոնավարման սկզբից մինչ ազատում կարճատև ընթացքը բնավ իսկ հագեցած չէր նորամուծություններով ու բարեփոխումներով, սակայն նրանցից յուրաքանչյուրի ազատումն իր հետևից անպատասխան հարցեր թողեց:

Հիմա, փաստորեն, կառավարման ոլորտի ճահճացած միջավայրից շարունակ դժգոհող վարչապետը այն տեղից շարժելու համար Հայաստանում կադրեր չտեսնելով կամ չցանկանալով տեսնել սփյուռքի օգնությանն է դիմում: Եվ որպես սփյուռքի հանձնակատարի աշխատանքի արդյունք շուտով հայկական սփյուռքից նոր հոսք կունենանք:

Վստահաբար, այս 100-ի մեջ գերակշիռ տոկոսը լոսանջելեսյան հայեր կլինեն: Սակայն, աշխարհի որ ծեգից էլ լինեն նրանք, հետաքրքիր է՝ ավանդակա՞ն սփյուռքի ներկայացուցիչներ են լինելու, թե՞ ՀՀՇ-ի զավակները:

Որոնք, ըստ տեղեկատվության, աշխարհի լավագույն համալսարաններն ավարտած՝ սեպտեմբերից կվերադառնան հայրենիք և ավելի քան 20 գերատեսչություններ կցնցեն:
Կառավարությունը դրական ցնցումներ է խոստանում: Դե, ի՞նչ, սպասենք ցնցումների՞: Ներդրումային բումի, տնտեսական հեղափոխության, ներգաղթի ու ծնելիության բումի սպասումները ի դերև ելան, հիմա 100 սփյուռքահայերի ենք սպասում, որ գան ու ցնցեն Հայաստանը: Ռազմավարական և քաղաքական նշանակության առումով այս ծրագիրը կյանքի կոչողները ՀՀ պատմության մեջ առաջինն են համարում: Ինչպես արդեն ընդունված է՝ աննախադեպ…

Վազգեն Սարգսյանին հիշեցի, որ 500 մահապարտների ջոկատով էր ցնցում… ի տես և ի սարսափ թշնամու:

Հեղինակ՝ Մ. Մինասյան

Աղբյուր` Փաստինֆո