Փաստ ինֆո

Ռոբերտ Քոչարյանի և մյուսների գործով դատակոչի ցուցակը լրացնելու մասին միջնորդությունն այս փուլում բավարարվել չի կարող. Դատարանը պետք է այդ միջնորդությունները թողնի առանց քննության՝ ոչ ժամանակին ներկայացված լինելու հիմքով։ Այս մասին ՀՀ երկրորդ նախագահ Ռոբերտ Քոչրայնաի և մյուսների գործով դատական նիստին ասաց մեղադրող դատախազ Պետրոս Պետրոսյանը՝ նշելով, որ պաշտպանական կողմն այդ միջնորդությւոնը կարող է ներկայացնել հետագայում, քանի որ այժմ գործը չի գտնվում ապացուցյների հետազոտման փուլում։

Մեղադրող դատախազ Գևորգ Բաղդասարյանը միացավ Պետրոս Պետրոսյանի դիրքորոշմանը՝ նշելով, որ մեղադրական եզրակացությունը դեռևս չի հրապարակվել, բացի այդ, դատավարական առումով սույն դատարանում պատկերացում չի կազմվել, թե որ հանգամանքները հերքելու կամ հաստատելում համար է պաշտպանական կողմը ցանկանում , որ այդ անձինք հրավիրվեն դատարան, ինչ արժեք ունի մեղադրանքի հիմքում, արդյոք գործում առկա ապացույցները բավարար չեն՝ հանգամանքները հաստատելու կամ հերքելու համար։ Գևորգ Բաղդասարյանը հստակեցրեց, որ միջնորդության քննությունը հետաձգելու մասին դիրքորոշումը վերաբերում է պաշտպան Հայկ Ալումյանի և Միհրան Պողոսյանի միջնորդությանը, իսկ պաշտպան Կարեն Մեժլումյանի միջնորդությունը ենթակա է մերժման։ Բաղդասարյանը նշեց, որ իրավամեկնաբանության կանոնները բոլորը հստակ գիտեն և քննարկումներում կողմերն արդեն անդրադարձել են դրան և, քանի որ տվյալ անձինք չեն կարող դատարանում հայտնել այնպիսի փաստական տվյալներ, որոնք վերաբերում են գործով ապացուցման առարկային, նրանք դատարանում չեն կարող հարցաքննվել։

Հիշեցնենք՝ պաշտպան Հայկ Ալումյանը միջնորդել էր դատակոչված վկաների ցուցակում ընդգրկել նաեւ հետևյալ անձանց՝ 2008թ մարտի 8-ին ՀՀ ՍԴ նախագահի պաշտոնը զբաղեցրած Գագիկ Հարությունյանին, ինչպես նաև՝ դատավորներ Հրանտ Նազարյանին, Կիմ Բալայանին, Վլադիմիր Հովհաննիսյանին, Ֆելիքս Թոխյանին, ինչպես նաև՝ Սամվել Մայրապետյանին , ՀՀ ՊՆ նախկին նախարար Միքայել Հարությանյան։ Պաշտպան Միհրան Պողոսյանը միջնորդել էր դատակոչի ցուցակում ներառել նաև Գևորգ Կոստանյանին, Մանվել Գրիգորյանին, Տիգրան Կարապետյանին, Վահագն Հարությունյանին և Արմեն Հակոբյանին։ Պաշտպան Կարեն Մեժլումյանը միջնորդել էր Հովիկ Աբրահամյանին, Դավիթ Հարությունյանին, Արմեն Ռուստամյանին, Ավետ Ադոնցին և Արծրուն Աղաջանյանին որպես վկա հրավիրելու և հարցաքննելու համար։ Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։
Հեղինակ՝ Իզաբել Սահակյան

Աղբյուր` Փաստինֆո