Փաստ ինֆո

Մեղադրանքի մեջ նշված է, որ ՍԴ անդամների նկատմամբ կիրառվել է ճնշում, բայց հստակեցված չէ, թե որ դատավորների։ Այս մասին ՀՀ երկրորդ նախագահի և մյուսների գործով դատական նիստին ասաց պաշտպան Հայկ Ալումյանը՝ արձագանքելով պաշտպանական կողմի ներկայացրած դատակոչի ցուցակը լրացնելու մասին միջնորդության վերաբերյալ մեղադրող կողմի դիրքորոշմանը։

«Այս որակի մեղադրական եզրակացությունը ստորագրել է պարոն Պետրոսյանը՝ առանց մանրամասնելու, թե ՍԴ կոնկրետ որ դատավորի նկատմամբ է ճնշում գործադրվել և ինչում է արտահայտվել այդ ճնշումը։ Հետևաբար, ըստ մեղադրանքի, կարելի է ենթադրել, որ խոսքն այդ ժամանակվա ՍԴ ցանկացած անդամի վերաբերյալ կարող է լինել։ Վերացական գրած է։ Այս տեսակի մեղադրանքը դատարանը նույնիսկ չպետք է դատական քննության ներկայացներ։ Այս տեսակի անորակ մեղադրանք դժվար է պատկերացնել», - հայտարարեց Ալումյանը։

Մեղադրող Գևորգ Բաղդասարյանը հստակեցրեց, որ Հայկ Ալումյանի և Միհրան Պողոսյանի ներկայացրած միջնորդությունների վերաբերյալ առարկայական վեճ չունեն, ընդամենն արձանագրում են, որ այս փուլում ժամանակավրեպ է խոսել այն հանգամանքների ապացուցված լինելու կամ հերքելու համար անձանց հարցաքննության հրավիրելու մասին։ Բաղդասարյանը չբացառեց, որ հետագայում հնարավոր է մեղադրանքի կողմը ևս միանա միջնորդություններին։ Բաղդասարյանը, անդրադառնալով իրավական որոշակիության վերաբերյալ պաշտպան Կարեն Մեժլումյանի հայտարարությանը, նշեց, որ արդեն մի քանի նիստ է դա է քննարկվում և, եթե չլիներ, այդքան այդ հարցը չէր քննարկվի, բայց խնդրի լուծման դատավարական ձևը դա չէ, այլ՝ պետք է իրավական մեկնաբանություն ներկայացնի պաշտպանը, այնուհետև՝ մեղադրող կողմը, իսկ դատարանը պետք է որոշում կայացնի։

«Իրավամեկնաբանության հարցերը դատական նիստերի դահլիճում փորձաքննություններով, տարբեր իրավաբանների կարծիքով չէ, որ պետք է որոշվեն»,- ասաց Բաղդասարյանը՝ նշելով, որ իրավակիրառության վերաբերյալ հարցերը հարցաքննությամբ որոշվել չի կարող։
Նախագահող դատավորը, լսելով դատավարության կողմերի դիրքորոշումը, որոշեց հետաձգել Հայկ Ալումյանի , Միհրան Պողոսյանի և Կարեն Մեժլումյանի ներկայացրած միջնորդությունների լուծումը։

Հիշեցնենք՝ պաշտպան Հայկ Ալումյանը միջնորդել էր դատակոչված վկաների ցուցակում ընդգրկել նաեւ հետևյալ անձանց՝ 2008թ մարտի 8-ին ՀՀ ՍԴ նախագահի պաշտոնը զբաղեցրած Գագիկ Հարությունյանին, ինչպես նաև՝ դատավորներ Հրանտ Նազարյանին, Կիմ Բալայանին, Վլադիմիր Հովհաննիսյանին, Ֆելիքս Թոխյանին, ինչպես նաև՝ Սամվել Մայրապետյանին , ՀՀ ՊՆ նախկին նախարար Միքայել Հարությունյան։ Պաշտպան Միհրան Պողոսյանը միջնորդել էր դատակոչի ցուցակում ներառել նաև Գևորգ Կոստանյանին, Մանվել Գրիգորյանին, Տիգրան Կարապետյանին, Վահագն Հարությունյանին և Արմեն Հակոբյանին։ Պաշտպան Կարեն Մեժլումյանը միջնորդել էր Հովիկ Աբրահամյանին, Դավիթ Հարությունյանին, Արմեն Ռուստամյանին, Ավետ Ադոնցին և Արծրուն Աղաջանյանին որպես վկա հրավիրելու և հարցաքննելու համար։ Մեղադրող կողմը նշեց, որ Կարեն Մեժլումյանի միջնորդությունը ենթակա է մերժման, իսկ Հայկ Ալումյանի և Միհրան Պողոսյանի ներկայացրած միջնորդությունները տվյալ փուլում քննարկման ենթակա չեն։
Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո