Փաստ ինֆո

Եգիպտոսի Ներկայացուցիչների պալատը (միապալատ խորհրդարանը) հավանություն է տվել այլ պետությունների տարածք զորք մտցնելու թույլտվությանը: Այս մասին հայտնում է Mada Masr պարբերականը։

Պարբերականն ընդգծում է, որ դրանով Կահիրեն Լիբիա զորք մտցնելու թույլտվություն է ստացել։ Որոշումը միաձայն ընդունվել է խորհրդարանի գաղտնի նիստում, որտեղ թույլ չեն տվել ոչ լրագրողների, ոչ լուսանկարիչների մուտքը։

Պատգամավորներից մեկը պատմել է, որ քվեարկությունն անցկացվել է երկրի նախագահ Աբդել Ֆաթթահ աս Սիսիի պահանջով:

Հունիսի 21-ին նա հայտարարել էր, որ Եգիպտոսը կարող է օրինական հիմունքներով ներխուժել Լիբիայի տարածք, քանի որ ուղղակի սպառնալիքներ է ստանում «ահաբեկչական վարձկաններից եւ աշխարհազորայիններից»: Պետության ղեկավարի խոսքով՝ ռազմական ուժի կիրառման նպատակը կլինի Եգիպտոսի սահմանի պաշտպանությունը, որի երկարությունը կազմում է 1,2 հազար կիլոմետր, ինչպես նաեւ հրադադարի ռեժիմի եւ հարեւան պետությունում խաղաղության եւ կարգուկանոնի հաստատումը: Այդ որոշմանը աջակցել են ԱՄԷ-ն և Սաուդյան Արաբիան։

1969-ից Լիբիան ղեկավարող Մուամար Քադաֆին տապալվեց և սպանվեց 2011-ին քաղաքացիական պատերազմի ժամանակ։ Արդյունքում երկիրը հայտնվել է երկիշխանության իրավիճակում. Արևելքում Տոբրուկ քաղաքում նիստ է գումարում խորհրդարանը, որն աջակցում է Լիբիայի ազգային բանակ ֆելդմարշալ Խալիֆա Հաֆթարի, իսկ արևմուտքում՝ Տրիպոլիում՝ ազգային համաձայնության կառավարությունը։ Ընդ որում, ԱՀԿ-ին ակտիվորեն աջակցում է Թուրքիան, իսկ ԼԱԲ-ի կողմից հանդես են գալիս Եգիպտոսն ու Սաուդյան Արաբիան։ Նրա ոչ պաշտոնական դաշնակիցներն են Ֆրանսիան և ԱՄԷ-ն։

Աղբյուր` Փաստինֆո