Փաստ ինֆո

Մարգարիտա Սիմոնյանը փաստացի Կրեմլի պաշտոնական խոսնակն է՝ ոչ պաշտոնական դիսկուրսում։ Այս մասին ասուլիսին ասել է «Այլընտրանք» ՀԿ ղեկավար Նարեկ Մանթաշյանը՝ անդրադառնալով Մարգարիտա Սիմոնյանի հայտարարությանը և նրա շուրջ ստեղծված լարված իրավիճակին։Մանթաշյանի խոսքով՝ Մարգարիտա Սիմոնյանի դեմ հարձակումներն իրականացնում են մեծամասամբ այն անձինք, ովքեր ռուսերենով տեքստը կարդալու դեպքում առ այսօր կկարդային, այսինքն՝ քննադատում են անձինք, ովքեր սպասում են «ֆաս» հրամանի։ Բացի այդ՝ Մանթաշյանը նշեց, որ Սիմոնյանը բարձրաձայնել է այն ամենի մասին, ինչի վերաբերյալ բազմիցս իրենք բարձրաձայնել են։ 

«Երբ որ նրանք պարբերաբար փչացնում էին հայ-ռուսական հարաբերությունները և տեղի ընդդիմադիր գործիչները խոսում էին այդ մասին, բարձրաձայնում էին, մեր նկատմամբ քամահրական վերաբերմունք էին ցույց տալիս, մեզ ասում էին՝ ճիշտ չեք, մենք ունենք աննախադեպ լավ հարաբերություններ Ռուսաստանի հետ, իշխանության հորինած սուտը տարածվում էր իրենց հավատացողների բանակում և այդ ստերի ողջ կծիկին վերջ դրեց Մարգարիտա Սիմոնյանը՝ ասելով, որ Հայաստանի իշխանություններ, դիմում եմ ձեզ, դուք Ռուսաստանի նկատմամբ չեք պահել գործընկերային ճիշտ հարաբերությունները և դեմ եք տվել վարկած, որ դրանք ՀՀ ներքին խնդիրներն են և հիմա Հայաստանն իրապես խնդիրների մեջ է, դուք այժմ աչքերը չռած սպասում եք Ռուսաստանի արձագանքին կամ օգնությանը, որն առնվազն արդար չէ։ Ես պնդում եմ, որ Մարգարիտա Սիմոնյանի տեսակետը նաև Ռուսաստանի պետական և պաշտոնական տեսակետն է, ինչի հետ մենք ստիպված են համակերպվել»,- ասաց Մանթաշյանը։ Տեղեկատվական անվտանգության փորձագետ Տիգրան Քոչարյանն էլ ասաց, որ հայ-ռուսական հարաբերությունների փայլն արդեն վաղուց չկա և խնդիրները գնալով խորանում են, տարբեր տեղերից կարելի է տեսնել այն կսմիթները, որոնք հասցվում են և՛ Ռուսաստանից, և՛ Հայաստանից։ Նա հիշեցրեց բոլորովին վերջերս Լավրովի բավականին կոշտ արձագանքը՝ գազի գնի, լաբորատորիաների, Նիկոլ Փաշինյանի՝ ՌԴ չմեկնելու մասին։

Քոչարյանը նշեց, որ նախկինում Ստեփան Դեմիրճյանը, Ռոբերտ Քոչարյանը, Անտոն Քոչինյանը շատ լավ հասկանում էին, թե ինչպես պետք է աշխատել ռուսների հետ և Հայաստանը բացի օգուտից, որևէ այլ բան չէր ստանում, միևնույն ժամանակ, որևէ մեկը չէր կարող ասել, որ նրանք դարձել էին ռուսի վասալ, ստրուկ և սեփական կարծիք չունեին, հարաբերությունները եղել են հավասար։ Նրա խոսքով՝ պետք է կարողանալ աշխատել խոշոր երկրների հետ, ոտքերը պետք է մեկնել վերմակի չափով։ Ինչ վերաբերում է Մարգարիտա Սիմոնյանին, ապա Քոչարյանը նշեց, որ վերջինս ռուսական համար մեկ քարոզչական լրատվամիջոցի ղեկավարն է, որն աշխատում է ՌԴ-ից դուրս, նա շփվում է պաշտոնյաների հետ և շատ լավ տեղյակ է շրջանակում տիրող տրամադրություններից։ Բացի այդ՝ Քոչարյանը նշեց, որ այդ հայտարարությունը պետք է առաջին հերթին զգաստացնի բոլորին, պետք է հասկանան, որ խնդիր կա և պետք է քայլեր ձեռնարկեն խնդրի լուծման համար, այլ ոչ թե՝ անցնեն փոխադարձ վիրավորանքի։

«Մենք ունենք տարբերակ. Ռուսաստանին պատերազմ հայտարարել՝ և՛ քարոզչական, և՛ այլ ճակատներում, կարծում եմ՝ Ուկրաինայի, Վրաստանի, Մոլդովայի փորձն այլ բան պետք է հուշի»,- ասաց Քոչարյանը, ապա հավելեց. «Շատ են ասում՝ Հայաստանը պետք է ինքնիշխան լինի, բայց,. Չգիտես ինչու, այդ ինքնիշխանության մասին խոսողները Ամերիկայից, Եվրոպայից հազարներով գրանտներ են ստանում և այդտեղ մոռանում են, որ Հայաստանն ինքնիշխան է»։

Աղբյուր` Փաստինֆո