Փաստ ինֆո

Ադրբեջանական ռազմական ագրեսիային ՀԱՊԿ-ի ներկայիս սառը արձագանքը՝ ՀՀ իշխանությունների քաղաքականության հետեւանքն է։ «Փաստինֆո»-ի հետ զրույցում նման կարծիք է հայտնել ռազմական փորձագետ Հայկ Նահապետյանը։

Փորձագետը հիշեցրեց, որ տարիներ առաջ, երբ Ադրբեջանը Տավուշի մարզի Չինարիի ուղղությամբ գործողություններ իրականացրեց՝ ավելի նվազ ուժերով՝ ՀԱՊԿ Գլխավոր քարտուղարը հայտարարեց, որ Ադրբեջանը սադրանք է իրականացնում ՀՀ-ի նկատմամբ, իսկ այժմ կեցվածք է դրսևորում ոչ թե ՀԱՊԿ-ի գլխավոր քարտուղարը, այլ՝ քարտուղարությունը, որը մեկ աստիճանով ցածր է։ Այն էլ՝ կոչ արեց կողմերին դադարեցնել փոխհրաձգությունը։

Նահապետյանը նշեց, որ կառույցի նման դիրքորոշման պատճառը ՀՀ իշխանությունների քաղաքականությունն է, որով փորձ էր կատարվել վարկաբեկել կառույցը՝ հիշեցնելով գեներալ-գնդապետ Յուրի Խաչատուրովի նկատմամբ քրեական հետապնդման մասին։

«Կառույցի ղեկավարի նկատմամբ՝ ի դեմս գեներալ-գնդապետ Յուրի Խաչատուրովի, ՀՀ նորընտիր իշխանություններն ապօրինի, անիրավ կերպով սկսեցին քրեական հետապնդում՝ չհարգելով նույնիսկ ՀԱՊԿ-ի կանոնադրությունը, երբ քրեական գործի հարուցման և հետապնդման վերաբերյալ կառույցին և կառույցի անդամ պետություններին պետք է զգուշացնեին, իսկ Հայաստանը որևէ զգուշացում չի արել։ Այսինքն՝ Հայաստանի իշխանություններն այն ժամանակ վարեցին մի քաղաքականություն, որով առավելագույն վարկաբեկում էին, փորձում էին վարկաբեկել ՀԱՊԿ-ին։ ՀԱՊԿ-ն այժմ իր իրավասությունների շրջանակներում ինքն իր գնահատականը բավականին սթափ և զուսպ ձևով տվել է»,- ասաց նա։

Իսկ թե ինչու ՀԱՊԿ-ն ավելի խիստ կեցվածք չի դրսևորում՝փորձագետը գտնում է, որ առկա է նաև քաղաքական կոմպոնենտ, մասնավորապես՝ 2016թ Ապրիլյան պատերազմից հետո Վիեննայում՝ ամենաբարձր մակարդակում եղավ հանդիպում և եղավ ստորագրված համաձայնագիր, որով արցախաադրբեջանական, այնուհետև՝ հայ-ադրբեջանական շփման գծի ամբողջ տարածքում միջազգային դիտորդական խմբերն ունենալու են շատ ավելի լուրջ իրավասություններ, դրվելու էին մշտադիտարկման սարքեր, Մինսկի խմբի համանախագահող երկրների և այդ խմբի մշտական ներկայացուցիչ Անջեյ Կասպրշիկի աշխատանքային խմբի թվաքանակն էր մեծանալու, որով կկանխարգելվեր որևէ պետության կողմից նախահարձակ գործողություններ սկսել, քանի որ խմբերը և սարքերն արագ կարձանագրեին, թե ով է սադրողը, մինչդեռ, երկու տարի առաջ ՀՀ նորընտիր իշխանություններն այդ փաստաթուղթը նետեցին մի կողմ և Նիկոլ Փաշինյանը հայտարարեց, որ բանակցությունները սկսում է նոր կետից։

Նահապետյանը նշեց, որ այժմ, երբ հայկական կողմը փորձում է միջազգային հանրությանն ապացուցել, որ սադրողն Ադրբեջանն է, դա շատ դժվար է, մինչդեռ, այդ կանխարգելիչ գործընթացը կլիներ, եթե Նիկոլ Փաշինյանը՝ որպես նոր իշխանություն շարունակեր նախկին իշխանությունների՝ Վիեննայի, Սանկտ Պետերբուրգի և Մոսկվայի համաձայնագրերի պայմանավորվածությունները կյանքի կոչել ։
«Այդ ժամանակ Ադրբեջանի համար շատ դժվար կլիներ լինել նախահարձակ և մնալ անպատիժ, իսկ հիմա հայկական կողմը դեռ պետք է ապացուցի, որ նախահարձակ է եղել Ադրբեջանը»,- ասաց նա։
Նշենք, որ միայն ադրբեջանական հերթական ագրեսիայից հետո Նիկոլ Փաշինյանը հայտարարեց՝ սահմաններին մոնիթորինգային համակարգի ներդրման մասին՝ փաստացի անիմաստ վատնելով երկու տարի։

Նա նաև տեղեկացրեց, որ ՌԴ Հարավային և Արևելյան օկրուգի ստորաբաժանումները զորավարժություն են սկսել՝ ոչ պլանային և այն սահմաններում, որտեղ կա տեռորիստների ակտիվացման գործընթաց, ընդ որում՝ Հարավային օկրուգի տարածքն իր մեջ ընդգրկում է նաև Հարավային Կովկասի տարածաշրջանը։

«Այսինքն՝ Ռուսաստանն այս քայլով բոլոր այն ուժերին, որոնք փորձում են այս տարածաշրջանում հրդեհի նոր օջախ ստեղծել և պատերազմական գործողություններ՝ իր դաշնակից Հայաստանի նկատմամբ, այդ զորավարժություններով բոլորին սաստում է, որովհետև զորավարժությունների ժամանակ զինտեխնիկայի և զինանձնակազմի մեծ քանակի տեղաշարժ է լինում, այդ տեղաշարժերն առաջին հերթին ուղղված են Թուրքիային, իհարկե նաև Ադրբեջանին և Թուրքիայի ռազմական դաշնակիցներին, որ այս տարածաշրջանում ՌԴ-ն թույլ չի տա՝ հրդեհ բռնկվելուն։

«Մեր դաշնակիցները գործնականում են մեզ աջակցում, այլ ոչ թե՝ կարգախոսներով, կենացներով, հայտարարություններով և սելֆիներով».- ասաց ռազմական փորձագետը։

Անդրադառնալով Ադրբեջանի ՊՆ հայտարարություններին, թե պատրաստ են թիրախավորել Մեծամորի ատոմակայանը, ռազմական փորձագետն ասաց, որ իրենք կարող են թիրախավորել, սակայն նշեց, որ Ադրբեջանի ՊՆ նախարարը հոգեբույժի կարիք ունի, որովհետև ատոմակայանին հարվածելը միայն Հայաստանի համար աղետ չի լինի, դա առաջին հերթին աղետ կլինի նաև Թուրքիայի համար, քանի որ Թուրքիայի բնակավայրերից 15 Կմ հեռավորության վրա է սահմանը, բացի այդ՝ դա աղետ կլինի Վրաստանի և ամբողջ տարածաշրջանի համար։

«Ցանկացած երկիր, եթե նման հայտարարություն է անում, պետք է առաջին հերթին արժանանա միջազգային հանրության կոշտ արձագանքին»,- ասաց ռազմական փորձագետը՝ ընդգծելով, որ Մեծամորի ատոմակայանը պաշտպանված է ցանկացած տեսակի օդային հարձակումից, ահաբեկչական խմբավորումների կամ այլ երկրների դիվերսիոն-հետախուզական խմբերի գործողություններից։
Նրա խոսքով՝ ատոմակայանի անվտանգությունը բավարար չափով ապահովված է և պարբերաբար զորավարժություններ են լինում ՀՀ-ում, որտեղ ներգրավված են ինչպես ԶՈՒ հատուկ նշանակության ստորաբաժանումները, ԱԱԾ և ԱԻՆ հատուկ ստորաբաժանումները։

«Մենք հասկանում ենք, որ այդտեղ վտանգ կա և մենք պատրաստ ենք։ Որքանով է իրավիճակն այս երկու տարվա ընթացքում բավարար, լավ, չեմ կարող ասել, որովհետև կենացներից, կարգախոսներից և սելֆիներից բացի ուրիշ ոչինչ չեմ տեսնում, բայց նախկինում պարբերաբար զորավարժություններ էր անցկացվում»,- նշեց Նահապետյանը։

Հեղինակ՝ Իզաբել Սահակյան

Աղբյուր` Փաստինֆո