Փաստ ինֆո

Երեւանի ավագանու «Լույս» խմբակցության ղեկավար Դավիթ Խաժակյանի վերաբերյալ ոստիկանությունում նախապատրաստվող նյութերից մեկով, ըստ ամենայնի, քրեական գործ կհարուցվի, այն ուղարկվել է քննչական մարմիններին։

«Գործերից մեկն արդեն հասել է քննչական մարմիններին և այն հիմնավորումները, որոնք կան, դեռևս մեզ ներկայացված էլ չեն, բայց ինքը բնույթով բավականին ծիծաղելի գործ է, որովհետև վերաբերում է վարորդի աշխատանքին։ Մեղադրանքը կայանում է նրանում, որ վարորդը քիչ է աշխատել»- «Փաստինֆո»-ի հետ զրույցում ասել Դավիթ Խաժակյանը և հավելել, որ այս գործում նաև իրեն են փորձում ներգրավել։

«Գործի հոդվածն էլ կարծես թե առնչվում է մի խումբ մարդկանց կողմից խարդախության ճանապարհով կյանքին վնաս պատճառելը և դրանով զբաղվում էր ոչ ավել, ոչ պակաս՝ Ոստիկանության 6-րդ վարչությունը»,- նշել է Դ.Խաժակյանը։

Նրա խոսքով՝ քննչական մարմիններն իրենց անկախությամբ ոստիկանությունից շատ չեն տարբերվում և վստահ է, որ ընթացք են տալու։

«Ես անհամբեր սպասում եմ, որ այդ գործը հասնի դատարան և ականատես լինենք ողջ իրավապահ համակարգի քաղաքական պատվերներ կատարելու թշվառությունը։ Երբ իրավաբանների հետ քննարկում եմ այս գործի մանրամասները, բոլորն ապշած նայում են դեմքիս, թե ո՞նց կարող է նման բան լինել»։

«Փաստինֆո»-ի այն հարցին՝ ինչո՞վ կարող է պայմանավորված լինել այսօրինակ անտրամաբանական գործընթացը, Դավիթ Խաժակյանը պատասխանեց. «Ես ենթադրություններ ունեմ, որ Փաշինյանի քավոր Ղալումյանների ընտանիքին մոտ կանգնած մեր ոստիկանապետը երևի շատ է սրտնեղել իմ տեղադրած այն տեսանյութից, որտեղ ես պատմում էի «Ռաշեն Վոյաժ» ՍՊԸ-ի, (որի սեփականատերը Վահագն Ղալումյանն է), թույլ տված խոշոր չափերի հասնող չարաշահումների մասին, որոնք նաև պետական փաստաթղթով հաստատված են։

Զարմանալին այն է, որ հիմա այդ գործը, որը 1 մլրդ. և ավել գումար է կազմում, քննում է ավելի ցածր քննչական լիազորություններ ունեցող մարմինը, քան վարորդի գործը»։

Մանրամասները՝ տեսանյութում։

Հեղինակ՝ Նվարդ Մանվելյան

Աղբյուր` Փաստինֆո