Փաստ ինֆո

ՀՀ վարչապետն այսօր իրականացնում է տարբեր գործառույթներ, որոնք ընդհանրապես իրենը չեն՝ սկսած իրավապահ որոշ համակարգից մինչև տարբեր ոլորտներ, համատիրություններ և այլն, «Հայելու առաջ» հաղորդման ժամանակ ասաց «Միասնություն» շարժման ղեկավար Արման Վարդանյանը:

Անդրադառնալով առողջապահության նախարարի վերջին հայտարությանը, որի համաձայն քրոնիկ կամ սրտային հիվանդություններ ունեցող անձինք կարող են դիմակներ չկրել, Վարդանյանն ասաց.

«Ես չգիտեմ անվանեմ, հանցագործության մասին հաղորդում թե ինչ։Եթե 4 ամիս այդ մարդկանց ստիպում էին կրել, նախարարը նո՞ր իմացավ, թե՞ գիտեր, բայց չէր ասում, որ մարդիկ մեռնեին: Որովհետև եթե մարդը ունի նման խնդիրներ, իրեն հակացուցված է կրել դիմակ, դա իր համար կարող է լինել մահացու», - ասաց Արման Վարդանյանը:

Նրա խոսքով՝ Նիկոլ Փաշինյանը և Արսեն Թորոսյանն սկզբում ավելի ազնիվ էին ժողովրդի հետ, քան հիմա, երբ ասում էին «համաճարակ չկա», «կորոնավիրուսն ում շունն է»։

Ինչ վերաբերում է անձամբ ՀՀ վարչապետ Նիկոլ Փաշինյանին, բանախոսը վերջինիս բացառիկ տաղանդավոր մարդ որակեց, քանի որ, ըստ նրա, միայն տաղանդավոր մարդը կարող էր երկու տարվա ընթացքում ոչնչացնել բոլոր լավ հարաբերությունները բոլորի հետ՝ թե ներքին, թե արտաքին գործընկերների հետ։

«Ժողովուրդն իրեն չի ընտրել, դա սխալ տեսություն է: Ժողովուրդն ընդամենը մերժել է հին համակարգը»։
Ըստ Վարդանյանի ժողովուրդը դուրս է գալիս էյֆորիայից, ավելի ադեկվատ է դառնում:

Աղբյուր` Փաստինֆո