Փաստ ինֆո

Սահմանին լայնածավալռազմական գործողությունները կանխելու համար երկու գործոն կա։ Այս մասին այսօր Մինսկում լրագրողների հետ զրույցում ասաց ՀՀ արտաքին գործերի փոխնախարար Շավարշ Քոչարյանը։

«Մեկն այն է, որ իրականացնում է մեր պաշտպանության նախարարությունը, մեր բանակը, որը ցույց է տալիս, որ այդպիսի մոտեցումները միշտ պատժվելու են։ Երկրորդը դիվանագիտական ասպարեզում պետք է լինել բավականաչափ ակտիվ, որովհետև ակնհայտ է, որ տեղի է ունեցել ագրեսիայի ակտ»,-ասաց Շավարշ Քոչարյանը։

Անդրադառնալով միջազգային գործընկերների արձագանքին՝ փոխնախարարը նկատեց՝ կարևոր է արձանագրել, թե ով էր, որ հրաժարվում էր՝ լինեն դիտորդներ, սարքեր, որոնք նմանատիպ իրավիճակներում կարողանան անկողմնակալ հայտնաբերել՝ ով է սկսել. «Դեմ էր Ադրբեջանը և այսօր փորձում է ներկայացնել, թե իբր հայկական ուժերն են սկսել հարձակումը։ Հենց այն հանգամանքը, որ նրանք միշտ դեմ են եղել, խոսում է այն մասին, որ ինքը միշտ կողմ է եղել նմանատիպ քայլերի։ Այդ տեսակետից որպեսզի միջազգային դիտորդները, միջնորդները, կազմակերպությունները կարողանան ոչ թե հենվել կողմերի հայտարարությունների վրա, այլ իրականում տեղի ունեցած փաստերի վրա, դրա համար անհրաժեշտ է՝ ընդհուպ տիեզերքից իրավիճակին հետևելով»,-ասաց Շավարշ Քոչարյանը՝ հավելելով, որ նա, ով նախաձեռնում է որոշակի արկածախնդրություն, նախապես պատրաստվում է և ինքն է ներկայացնում՝ իբր ինքն է հարձակման ենթարկվել։
Հարցին՝ պաշտոնական Երևանը հիասթափված չէ՞ ՀԱՊԿ-ի հայտարարությունից, փոխնախարարն արձագանքեց. «Նախ եկեք արձագանքենք, որ մենք ՀԱՊԿ-ին օգնության համար չենք դիմել։ Կա ՀԱՊԿ-ի կանոնադրության համապատասխան հոդված, որ երբ հարձակում է լինում, պետք է դիմես օգնության, մենք չենք դիմել։ Մեր նպատակը լրիվ այլ էր՝ տեղեկացնել մեր գործընկերներին՝ ինչ իրավիճակ է։ Ակնհայտ է, որ եթե ՀՀ սահմաններին սադրանք է եղել, նրանք պետք է տեղեկանան։ Դրա համար ինձ համար զարմանալի է, որ մարդիկ ինչ-որ սպասելիքներ ունեն»,-ասաց փոխնախարարը։

Դիտարկմանը, որ խոսքը հայտարարության բովանդակության մասին է, Շավարշ Քոչարյանն ասաց, որ տվյալ պարագայում ՀԱՊԿ-ն ընդամենը արձանագրել է, որ կոչ է անում՝ դա կանգնեցվի, որովհետև հակառակ դեպքում, եթե մենք դիմենք, ստիպված կլինի ներքաշվել։

Աղբյուր` Փաստինֆո