Փաստ ինֆո

Ադրբեջանը թիրախավորում է խաղաղ բնակչությանը, և մենք Մարդու իրավունքների եվրոպական դատարան դիմելու հիմքեր ունենք։
«Փաստինֆո»-ի հետ զրույցում միջազգային իրավունքի փորձագետ Արա Ղազարյանն ասաց, որ նրանք, ովքեր թիրախավորվել են թշնամու կողմից, նյութական կամ մարմնական վնասվածք ստացել, ապա ՄԻԵԴ դիմելու բավարար հիմքեր ունեն։

«Այս գործերի բարդությունն այն է, որ պետք է անհատականացնել այդ ամբողջը։ Այսինքն իրավական հիմքերը կան, բայց նաև պետք է ապացուցել այդ ամբողջը։ Նման գործերի բարդությունն ապացուցումն է։ Կոնկրետ նկարը ցույց ենք տալիս, որ ասենք՝ տունը վնասվել է, բայց պետք է ապացուցել, որ տունը վնասվել է Ադրբեջանի կողմից արձակած արկի արդյունքում։ Դա այդքան հեշտ չէ, քանի որ ինչ-որ մեկը մեզ տեղեկանք չի տալու, որ այս արկն արձակվել է այսինչ համարի թնդանոթից, որը կրակել է հրետանավոր այսինչը։ Դրա համար ապացույցների այլ եղանակներ կան։ Ունենք բավարար ապացույցներ, որովհետև իրավասու մարմինները ֆիքսոմ են դա։ Այստեղ մեծ աշխատանք է կատարում մարդու իրավունքների պաշտպանը, և նրա խոսքն ավելի վստահելի ու ընդունելի է։ Նա բավականին լավ աշխատանք է կատարում, քանի որ ամրագրում և շատ օպերատիվ կերպով տրամադրում է իր զեկույցները։ ՄԻՊ-ի զեկույցներին, որպես կանոն, հավատում են։ Այսինքն պետական մարմինների տարբեր զեկույցները, ճեպազրույցները, այս ամբողջն ամրագրվում է որպես ապացույց ու ներկայացվում»,-ասաց Արա Ղազարյանը։

Հարցին՝ արդյոք միջազգային հանրության արձագանքը նույնպես որևէ դեր ունի այստեղ, փորձագետը նկատեց՝ դրանք կարող են փաստել ներկայացված ապացույցների հավաստիությունը, այսկերպ ամրապնդվում է ապացույցների հավաստիությունը, բայց ինքնին ապացույց չեն։

Անդրադառնալով հարցին՝ կա՞ ընթացակարգ, որ օրինակ համայնքը դիմի ՄԻԵԴ, Արա Ղազարյանն ասաց, որ համայնքը չի կարող դիմել, բայց կարող է ներկայացնել շահերը. «Իհարկե որոշ բացառություն կազմող դեպքերում գուցե 20 հոգին միավորվեն որպես համայնք, բայց միևնույն է, սա անհատական գանգատի քննության պրոցես է»,-նշեց Արա Ղազարյանը։

Նշենք, որ դեռ 2016թ.-ին ապրիլյան պատերազմի ժամանակ Ադրբեջանի կողմից խաղաղ բնակչությանը թիրախավորելու վերաբերյալ բազմաթիվ դիմումներ են ներկայացվել ՄԻԵԴ։ Արա Ղազարյանը նշեց, որ ապրիլյան պատերազմով դիմումների թիվը մոտ մի քանի հարյուրի է հասնում, որից 200-ը քննության մեջ է։ Թե հավանական ինչ հաջողություն կարող են ունենալ այդ դիմումները, Արա Ղազարյանը դժվարացավ ասել՝ նշելով՝ քանի որ քրեական գործ է հարուցված, պետք է տեսնենք, թե ինչով կավարտվի։

Հիշեցնենք, որ 2020թ. հուլիսի 12-ից 16-ն ընկած ժամանակահատվածում Ադրբեջանի զինված ուժերը Տավուշի մարզի տարբեր բնակավայրերի և հայկական մարտական հենակետերի ուղղությամբ տարբեր տրամաչափի զինատեսակներից կրակ են արձակել։ Տավուշի մարզի տարբեր բնակավայրերի վրա արձակված կրակոցների հետևանքով վնասվել է 24 տուն, 1 կոնյակի և 1 գինու գործարան, 1 մանկապարտեզ, գերեզմանատուն, 4 ավտոմեքենա, 1 ջրագիծ, 1 գազատար, 1 ջերմոց, ոստիկանական 1 պահակակետ, որտեղ գտնվող 2 ոստիկաններ ստացել են մարմնական վնասվածքներ: Բացի այդ, մարմնական վնասվածք է ստացել 1 քաղաքացիական անձ:

Աղբյուր` Փաստինֆո