Փաստ ինֆո

«Պարգևավճարների խնդիրը միայն Արաբկիր համայնքի թաղապետարանում չէ, այլ բան է, որ այնտեղ դա բացահայտ և հրապարակային դրսևորում գտավ, համարձակորեն թաղապետի առաջ պահանջներ դրվեցին։ Սա ընդհանուր քաղաքապետարանի ներսում եղած գլոբալ խնդիր է, որը Մարությանը շանս ուներ լուծելու դեռևս 2019 թվականին, երբ հնարավորություն ստեղծվեց վերանայելու հաստիքացուցակները և դրա արդյունքում բարձրացնելու աշխատակիցների աշխատավարձերը։ Փոխարենը, Մարությանը որոշեց պահպանել ուռճացված հաստիքացուցակը, էլ ավելի ուռճացրեց պարգևավճարների ֆոնդը, հասցնելով կրկնակիից ավելի և հիմա թերի հատկացումներ է անում,- «Փաստինֆո»-ի հետ զրույցում ասաց Երևան քաղաքի ավագանու անդամ, «Լույս» խմբակցություն ղեկավար Դավիթ Խաժակյանը՝ անդրադառնալով Արաբկիր համայնքի թաղապետարանի աշխատակիցների բարձրացրած բողոքի թեմային։

Նա նկատեց, որ վերջին անգամ թաղապետարանների աշխատակիցների աշխատավարձերի չափը վերանայվել է հեռավոր 2002 թվականին, հետեւապես պետք է ասել, որ այդ բողոքը բավական օբյեկտիվ պատճառներ ունի»։

«Փաստինֆո»-ի հետ զրույցում Դավիթ Խաժակյանը նկատում է՝ քաղաքապետարանում կա ընկալում, որ պարգևավճարների զգալի մասը քաղաքապետ Հայկ Մարությանի մտերիմներին է բաժին հասնում. «Որպեսզի օբյեկտիվ պարզաբանում տրվի այս հարցին, ես կհրապարակեմ քաղաքապետարանի ողջ պատմության ընթացքում գրանցված ամենամեծ պարգևավճարի գինը, որ 1 անձին 1 ամսվա համար կազմել է 2. 350 000 դրամ և այդ անձը եղել է Հայկ Մարությանի արդեն նախկին խորհրդական Հայկ Համբարձումյանը։ Հետագայում այդպիսի մեծ ծավալ տրվեց նաև քաղաքապետի տեղակալ Հայկ Սարգսյանին, ով կրկին լքեց պաշտոնը։ Հիմա ո՞րն է խրախուսման տրամաբանությունը՝որպեսզի մարդն ավելի լավ աշխատի, բայց ստացվում է, որ Հայկ Մարությանի կողմից ամենամեծ ծավալների խրախուսման արժանացած երկու աշխատակիցներն էլ, որոնք, ի դեպ քաղաքապետի մտերիմներնն էին կարճ ժամանակ անց հեռացան քաղաքապետարանից և նոր աշխատանքի անցան։ Ընդ որում, այդ ծավալի պարգևավճարները տրվեցին կարանտինի ամենաբարդ շրջանում ապրիլ ամսվա սկզբին, երբ մարդիկ հարկադիր պարապուրդի արդյունքում տներում փակված էին և ֆինանսական միջոցների լուրջ խնդիրներ ունեին»։

Մեր այն հարցին, թե ինչո՞վ է պայմանավորված քաղաքապետ Հայկ Մարությանի որդեգրած այս աշխատաոճը, Դավիթ Խաժակյանը պատասխանում է՝ որպեսզի մարդ ջանք գործադրի որևէ բան անելու համար, նախևառաջ պետք է ունենա մոտիվացիա. «Արդեն ավելի քան մեկ տարի է քաղաքապետարանի ներսում մոտիվացիայի էական պակաս է նկատվում, այս իշխանությունների հետ աշխատելու տրամադրվածության բացակայություն, որի արդյունքում քաղաքապետարանում շատ ու շատ գործեր ուղղակի կանգ են առել։ Նույնիսկ մենք՝ ավագանու անդամներս, երբ փորձում ենք որևէ խնդիր մատնանշել և լուծել, ուղղակի պատին ենք բախվում, որովհետև կա բոլորի գործելու կաշկանդվածություն, չտրամադրվածություն և հավեսի բացակայություն։ Շատերը քաղաքապետարանում ասում են՝ մի քաղաքապետ, որ 3 ամիս է նորմալ աշխատանքի չի գալիս՝ ումի՞ց ի՞նչ ակնկալենք»։

Մանրամասները՝ տեսանյութում։

Հեղինակ՝ Նվարդ Մանվելյան

Աղբյուր` Փաստինֆո