Փաստ ինֆո

«Բոլոր նրանց, ովքեր գուցե չգիտեն, թե այժմ ինչ է կատարվում Հայաստանում, ես կցանկանայի ներկայացնել ստեղծված իրավիճակը՝ ակնկալելով ձեր աջակցությունը»,- Ինստագրամ սոցկայքի իր էջում գրում է Ռեալթի շոուի աստղ Քիմ Քարդաշյանը՝ ընդգծելով, որ ընթացող համավարակի պայմաններում Ադրբեջանը, անտեսելով ՄԱԿ-ի՝ ամբողջ աշխարհում ռազմական գործողությունները դադարեցնելու հորդորը, հարձակում է գործել Հայաստանի Հանրապետության վրա։

Ավելի վաղ միևնույն հաղորդագրությունը թվիթերյան էջում տեղադրելով՝ Քարդաշյանը իր հետևորդներին հայտնել էր, որ «Հայաստանի տարածքում թիրախավորվել են քաղաքացիական կառույցներ, իսկ այժմ Ադրբեջանը սպառնում է հարված հասցնել Հայաստանում գտնվող ատոմակայանին»՝  հավելելով, որ հաջորդ շաբաթ Կոնգրեսում տեղի է ունենալու քվեարկություն, որով երաշխավորվելու է, որ ԱՄՆ-ն Ադրբեջանին չի տրամադրում այնպիսի ռազմական օգնություն, որն այնուհետև օգտագործվելու է Հայաստանի և Արցախի դեմ: Նա կոչ է արել Կոնգրեսին քվեարկել Ադրբեջանին ռազմական օգնություն տրամադրելու արգելքի օգտին

Քարդաշյանը միջազգային հանրությանը կոչ էր արել ուշադրություն դարձնել այս զարգացումներին և միջամտել՝ կիրառելով այնպիսի քաղաքական և դիվանագիտական միջոցներ, որոնք կկանխեն հետագա սրումն ու մարդկային կյանքերի կորուստը:

«Ես կանգնած եմ հայրենակիցներիս կողքին և աղոթում եմ նրանց համար, ովքեր երկրի սահմանին են»,-նշել էր Քարդաշյանը:

Աղբյուր` Փաստինֆո