Փաստ ինֆո

Մեր ծառայողները ռմբակոծվող գյուղերում աշխատում են բնակչության հետ։ Մեր խնդիրն այնտեղ բնակչության անվտանգության ապահովումն է և միաժամանակ հրդեհների ու ավերածությունների վերացումը։ Այս մասին այսօր կառավարության նիստի ժամանակ ասաց ՀՀ արտակարգ իրավիճակների նախարար Ֆելիքս Ցոլակյանը։

«Հրդեհներ արդեն եղել են։ Մեր մեքենաները մոտենալու խնդիր ունեն, որովհետև կրակի տակ են։ Մենք այդ գյուղերին ապահովում ենք հրշեջ մեքենաներով։ Անձնակազմը, ամեն ինչը կա, բացի այդ Երևանից լրացուցիչ ուժեր ենք ուղարկել, որոնք համապատասխան տեխնիկայով միայն ավերածությունների համար են գնացել և գտնվում են Բերդի տարածաշրջանում։ Խիստ հրահանգներ կան խմբերով չլինելու, առանձին, քիչ մարդկանցով շրջագայելու»,-ասաց Ֆելիքս Ցոլակյանը։

ՀՀ վարչապետ Նիկոլ Փաշինյանը հավելեց, որ երկու տեղում ունեցել էինք գյուղ մտնող գազամուղի խողովակի վնասում, այսօր գիշերն էլ է այդպիսի դեպք եղել, բայց հրդեհն արագ մարվել է։ Նիկոլ Փաշինյանը հույս հայնտեց, որ հնարավորինս արագ ենթակառուցվածքը կվերականգնվի։

Ֆելիքս Ցոլակյանը նշեց, որ երեկվանից հրշեջ մեքենաները ներկել են, որ կարմիր գույնն ավելի լավ երևա, Նիկոլ Փաշինյանն էլ նկատեց՝ իզուր է ասում. «Եթե բնակելի տներին են խփում, էլ հրշեջ մեքենան չեմ կարծում՝ ինչ-որ առանձնահատուկ դրական վերաբերմունքի արժանանա»,-ասաց վարչապետը։

ԱԻ նախարարն էլ ասաց, որ երկու հրդեհները, որ եղան Այգեպարում և զորամասում, երկուսն էլ կրակի տակ էր, բայց հաջողվել է հդրեհը հանգցնել. «Մենք խնդիր ունենք։ Պաշտպանության նախարարությանը խնդրանք ունեմ»,-ասաց ԱԻ նախարարը, ում վարչապետը հորդորեց այդ հարցերն աշխատանքային կարգով քննարկել։

Աղբյուր` Փաստինֆո