Փաստ ինֆո

Հայաստանն այս օրերին պայքարում է արտաքին ու առողջապահական թշնամու՝ ադրբեջանական ագրեսիայի ու կորոնավիրուսի դեմ, երկրում 70 հազար մարդ համալրել է գործազուրկների բանակը, իսկ Երեւանի քաղաքապետարանում շարունակվում են պարգևավճարներ բաժանել։

Երևանի քաղաքապետ Հայկ Մարությանը հուլիսի 13-ին որոշում է ստորագրել Երևանի քաղաքապետի տեղակալներին, վարչությունների ու բաժինների պետերին, Երևանի քաղաքապետարանի աշխատակազմի ներքին աուդիտի բաժնի աշխատակիցներին և Երևանի վարչական շրջանների ղեկավարներին պարգեւատրելու մասին։

Այսպես՝ Հ. 700 կարգադրությամբ, 480.000-ական դրամով են պարգևատրվել քաղաքապետի 4 տեղակալները, Երևան քաղաքի գլխավոր ճարտարապետն ու աշխատակազմի քարտուղարը:

Քաղաքապետի խորհրդական Կամո Արեյանի և խոսնակ Հակոբ Կարապետյանի պարգևավճարային գումարի չափը 840.000-ական դրամ է:
Կոմունալ տնտեսության վարչության պետը, Ճարտարապետության և քաղաքաշինության վարչության պետը, քարտուղարության պետը ևս պարգևատրվել են 840,000-ական դրամով։

672,000 դրամով պարգևատրվել են վարչության պետի երկու տեղակալները։

Պարգեւատրվել է 45 բաժնի պետ, որոնց տրվող պարգևավճարների թիվը տարբեր է, ամենացածրը՝ 121,000 դրամն է, իսկ ամենաբարձրը՝ 620,000 հազար դրամ, որով պարգևատրվել է ֆինանսական վարչության բաժնի պետ Ավետիսյան Քրիստինեն։ Ի դեպ՝ նա ավելի շատ է պարգեւատրվել, քան իր վարչության պետը, որի պարգևավճարը 280,000 դրամ է։

Քաղաքապետարանի աշխատակիցների ընդհանուր պարգևավճարային ֆոնդը կազմել է 47,053,217 դրամ:
Երևանի քաղաքապետի նույն կարգադրության համաձայն՝ 840 000-ական դրամով են պարգևատրվել նաև Երևան քաղաքի բոլոր՝ 12 վարչական շրջանների ղեկավարները:

Պարգևավճարային ֆոնդը վարչական շրջանների ղեկավարների մասով կազմել է 10,080,000 դրամ։
Ընդհանուր պարգևավճարային ֆոնդը կազմել է 57,133, 217 դրամ:

Երևանի քաղաքապետ Հայկ Մարությանի որոշմամբ՝ քաղաքապետարանի պարգևատրման ֆոնդից 100 միլիոն դրամ կհատկացվի համայնքային ենթակայության բուժհաստատությունների աշխատակիցներին։

Աղբյուր` Փաստինֆո